31/12/09

Os expropiados de Castro de Elviña culpan á Universidade do “bloqueo” do proceso


El Ideal Gallego
30/12/2009
A Coruña


Lorena Fernández> A Coruña

Os afectados polas expropiacións de Castro de Elviña pola construción da residencia universitaria esperan desde hai meses a que a propia Universidade ratifique o acordo ao que chegaron co Concello e a Xunta, aínda que, segundo explica o seu portavoz, Carlos Maceiras, “parece que está desaparecida”.

Desde a súa chegada ao cargo, o delegado provincial da Xunta, Diego Calvo, comprometeuse a defender o pacto inicial, alcanzado co anterior Goberno galego, pois consideraba razonables as esixencias dos afectados.

Pola súa parte, desde a Concellaría de Urbanismo, tamén aceptaron estas condicións, se ben é agora cando falta unha resposta do órgano educativo, ao que os residentes culpan do “bloqueo” de todo o proceso. O pacto consistía basicamente en aumentar o prezo que lles abonaría a administración por metro cadrado ata superar os 800 euros no caso do terreo edificado, co obxectivo de achegarse ao que debían pagar os expropiados pola súa nova vivenda de protección oficial, entre 900 e 1.200 euros o metro. No caso das fincas, o prezo sería de 105 euros.

Os veciños de Castro de Elviña encheron de pancartas o entorno do campus pedro puig

Contradición > Pese a que o reitor, José María Barja, manifestou publicamente en varias ocasións a súa conformidade co acordado, os expropiados aseguran que “o delegado da Xunta ten un informe no que se reflexa que a Universidade non está de acordo”. Así mesmo, acusan ao vicerreitor de Infraestruturas, Xosé Lois Martínez, de “dar plantón” a unha representación dos afectados nunha reunión convocada a tres bandas, hai apenas un mes, pola responsable de Urbanismo, Obdulia Taboadela, na que estaba previsto que o responsable universitario deixase clara a súa postura neste asunto.

Ante esta situación, Maceiras explica que xa solicitou unha reunión con Barja, para a que aínda non hai data. “Queremos saber por qué non move ficha, o porqué deste silencio”, indica, á vez que reclama tamén o apoio do resto de administracións implicadas. “Cremos que como parte interesada neste tema tamén poden facer de mediadores”, señala.

Con todo, avisan de que, de non obter unha solución en breve, estudiarán a posibilidade de retomar as mobilizacións, pois, segundo manifesta o seu portavoz, “a indefinición duns poucos está deixando sen aire a 11 familias afectadas, que levan moitos anos sen saber o que vai pasar coas súas casas”.

Polo momento, os veciños xa encheron o entorno do campus de pancartas para reivindicar os seus dereitos e para denunciar o tratamento que están recibindo, que o seu representante califica de “indigno”.

29/12/09

A UDC acusa o Concello do atraso nos realoxos de Elviña

Xornal de Galicia
28/12/2009
Galicia

O vicerreitor de Infraestruturas di que as “instancias expropiatorias” como o Concello e a Xunta son os responsables da demora

Daniel Prieto. Galicia.

O vicerreitor de Infraestruturas da Universidade da Coruña (UDC), Xosé Lois Martínez, acusou ao Concello da Coruña e á Xunta do “atraso de máis de 18 años” do realoxo no entorno do campus das once familias afectadas polas expropiacións para a construción da área residencial de Elviña – licitada por 24 millóns hai un ano– e do Parque Tecnolóxico. Martínez tamén exculpou á universidade de calquera responsabilidade neste sentido, xa que, “nunca é a universidade a que expropia, senón que recibe a propiedade do solo para construir determinados edificios”, en resposta ás acusacións da Asociación Veciñal Elviña-Castro Os Rexumeiros, que sinalaron á UDC como a responsable da demora dos realoxos.

Segundo Xosé Lois Martínez, “a UDC excluíu do ámbito do Plan Parcial de 1990 máis de 200.000 metros cadrados de propiedade privada e unhas 30 vivendas da zona”, o que na súa opinión reflicte “que a universidade se preocupou desde o inicio polos veciños afectados no proceso”. Tal e como explicou “ese plan recolle que a obtención do chan correrá basicamente a cargo co Concello coruñés, e que as actuación urbanizadoras son responsabilidade da universidade e, como consecuencia, da Consellería de Edic.

Por outra banda, o vicerreitor de Infraestruturas da UDC cualificou de “terrible” o feito de que “pasaran case 20 anos sen expropiar a eses veciños, xa que os custos de expropiación suben exponencialmente”. Ademais, sinalou que o “Concello da Coruña debeu realizar un reparto de edificabilidade nos terreos fronte á universidade, que valen 1.000 euros o metro cadrado fronte aos 100 euros metro cadrado do campus” e apuntou á modalidade da “cooperación, na que “unha administración e os propietarios deses terreos desenrolan un ámbito especial”.

En canto aos sete inmobles afectados polas expropiacións, Xosé Lois Martínez indicou que “o Instituto galego de Vivenda e Solo (IGVS), da Consellería de Medio Ambiente, expropiou os terreos para a construción da residencia universitaria”, mentres que na zona do Parque Tecnolóxico foi “a Cosensellería de Educación quen lle cedeu os cartos ao Concello da Coruña, que contactou coa UDC para que realizase un espediente de expropiación”.

Deste xeito, o vicerreitor precisou que “a actua a Consellería de Medio Ambiente é a encargada de realoxar aos afectados” pola área residencial, mentres que no caso do Parque Tecnolóxico “o Concello coruñés é o responsable do realoxo”.

proposta recollida no pxom

A anterior Consellería de Vivenda contactou coa UDC e co Concello coruñés para abordar o tema do realoxo, e a universidade propuxo “edificar 20 vivendas nas proximidades da Facultade de Arquitectura”, asegurou Martínez. De feito, no actual Plan Xeral de Ordeación Municipal (PXOM) coruñés, actualmente exposto ao público, “hai un terreo que coincide con esa proposta, e a universidade non viu ningún problema en que se realizara o realoxo nesa zona, destinada a vivendas para os profesores”, engadiu.

Na súa opinión, “o problema é que a Consellería de Vivenda contemplou só o realoxo de dúas vivendas e a universidade de sete”, e ademais o proxecto “non se asinou, porque o Concello considera que é un tema do que se tiña que encargar a UDC”,

O vicerreitor insistiu en que son as “instancias expropiatorias” as que deben afrontar ese proceso. “Seriamos a primeira universidade de España en construir vivendas para os expropiados. A finalidade da universidade é o estudo e a investigación, o resto non nos compete”, precisou Xosé Lois Martínez, que asegura que “a universidade apoiará sempre o realoxo dos afectados na zona inmediata próxima ás súas vivendas”.

REUNIÓN COS VECIÑOS

Respecto ás acusacións dos membros da Asociación Os rexumeiros, que aseguraron que “o vicerreitor non quixo reunirse cos veciños nunha reunión onde se iban abordar temas cruciais”, Xosé Lois Martínez asegurou que ese día tiña unha “cita de traballo inexcusable” perp que está “aberto ao diálogo en todo momento”.

En opinión de Carlos Maceiras, o presidente da asociación veciñal de Elviña, a UDC “aínda non respostou a un requerimento do Concello da Coruña onde se lle preguntaba como iba a afectar o realoxo aos veciños”. Ademais, os veciños engadiron que “a universidade non está facendo o que publicamente di que fai”.


22/12/09

Os veciños de Elviña acusan a UDC do atraso nos realoxos


Xornal de Galicia
22/12/2009
Galicia
D. Prieto. Galicia.

Os veciños de Castro-Elviña, que levan máis de tres anos mergullados nun litixio debido ás expropiacións pola construción da área residencial universitaria de Elviña, no campus universitario coruñés, acusan á Universidade da Coruña (UDC) da demora no realoxo. "A cousa sigue enquistada e independentemente de que as administracións se boten a pelota unhas ás outras, a situación agora é culpa da UDC e sentímonos enganados por ela", sinalou Carlos Maceiras, presidente da Asociación de Veciños Elviña-Castro Os Rexumeiros. Os residentes queren ser realoxados na contorna da residencia, licitada por 24 millóns de euros hai un ano.

As sete vivendas afectadas, onde viven once familias, locen pancartas coa valoración dos terreos efectuada polas entindades implicadas no proceso expropiatorio: o Instituto Galego de Vivenda e Solo, a Consellería de Vivenda, a Consellería de Industria e o Concello da Coruña, dependendo do caso. A asociación veciñal mantivo conversas co Delegado da Xunta Diego Calvo, coa concelleira de Urbanismo do Concello da Coruña, Obdulia Taboadela, e co Instituto Galego de Vivenda e Solo, que resultaron "fructíferas", sinalou Carlos Maceiras. Sen embargo, o vicerreitor de Infraestruturas da UDC, Xosé Lois Martínez, "non quixo reunirse cos veciños, ao igual que o rector", precisou.

En opinión de Maceiras, a UDC que "aínda non respostou a un requerimento do Concello da Coruña onde se lle preguntaba como había afectar o realoxo aos veciños". Ademais, o presidente dos Rexumeiros engadiu que "a universidade non estaba dacordo cun informe do anterior Goberno da Xunta polo tema das expropiacións, e non está facendo o que publicamente di que fai".

"O señor Xosé Lois Martínez fala sempre de futuro e non de presente, e nunca se refire ás expropiacións", afirmou Carlos Maceiras. Os Rexumeiros instaron á UDC "a poñer o terreo a disposición da Xunta para facer as vivendas dos veciños na contorna dunha vez", tal e como recolle o Plan Parcial de 1991.

Pola súa banda, Xosé Lois Martínez, sinalou que "o actual equipo de Goberno da Universidade sempre estivo, está e estará ao lado dos veciños de Elviña que viven na zona" e apoiou "que sexan realoxados na contorna, para o que elevaremos ás institucións expropiatorias que sexan ubicados no lugar".

14/12/09

O Plan Director da Universidade busca firmar a paz coa zona rural de Elviña

El Ideal Gallego
10/12/2009
A Coruña
C.R.> A CORUÑA
O vicerreitor de Infraestructuras, Xosé Lois Martínez, presentou onte o Plan Director da Universidade no que a empresa Prointec -adxudicataria do proxecto- leva meses traballando e polo que se guiarán todas as obras que se leven a cabo en calquera dos campus, desde Esteiro, en Ferrol, ata Elviña. O documento, de máis de 600 páxinas, contempla mellorar a relación cos núcleos rurais do entorno de Elviña.

Os residentes nestas zonas teñen acusado en varias ocasións ao organismo de ser o causante da desaparición destes núcleos debido ás expropiacións executadas para o crecemento do campus. Agora, a Universidade pretende solventar este problema. Segundo Martínez, xa existe unha relación entre os alumnos e estas zonas e o obxectivo agora é “o reforzamento dos núcleos rurais” como Castro, Eirís ou San Vicente. Para o responsable de Prointec, Pablo Campos, os estudantes poden aprender dese estilo de vida e das construcións, especialmente os alumnos de arquitectura. Pero o vicerreitor resalta que para iso é necesaria unha importante rehabilitación da zona que pasaría por unha implicación municipal.

En canto a como crecerá entón a Universidade para evitar desmantelar estas áreas, Campos é claro, non é necesario aumentar a superficie. “É moi grande xa”, declara. Aposta, en cambio, por unha “recualificación” dos campus segundo as súas especificidades para mellorar o aproveitamento das infraestructuras e da superficie da que dispón a Universidade. “Hai moitos espazos inertes a efectos educativos e non é difícil transformalos en produtivos”, declara o arquitecto. Deste modo tamén se adaptará o entorno ao Espazo Europeo de Educación Superior.


Integración > Un dos retos do Plan Director é, entre outros, conseguir que os campus deixen de ser “cidades pantasma” ou “dormitorio” que só teñan actividade durante determinadas horas e días da semana. Os responsables do documento cren que esta tendencia comenzará a cambiar coa construción da residencia de estudantes, que requerirá outros equipamentos complementarios.

O gran obxectivo do documento é conseguir que a cidade e a Universidade non se entendan como áreas independentes e “optimizar” a relación que manteñen. Para iso, tamén se intentará que o proxecto evolucione parello ao PXOM. Xosé Lois considera que para evitar que o ente educativo se convirta nun “gueto” é necesario “focalizar o seu ámbito” de actuación que incluiría non só Oleiros, A Coruña e Ferrol senón a toda a comarca.

As primeiras hortas urbanas de Feáns ocuparán 7.400 metros


La Opinión de A Coruña
04/12/2009
A Coruña

Os veciños da zona ceden de forma gratuita os terreos, nos que 25 persoas solicitaron practicar a agricultura como afición

O soño de moitas persoas de practicar a agricultura como afición pode materializarse xa en Feáns, onde os veciños cederon 7.400 metros cadrados para a iniciativa Hortas na cidade. Ata agora son 25 os inscritos nesta actuación, para a que non se precisa ningunha experiencia nos labores agrícolas e que se leva a cabo por parte do Colexio de Arquitectos


JOSÉ MANUEL GUTIÉRREZ A CORUÑA A iniciativa Hortas na cidade, que ten como finalidade promover a práctica da agricultura con fines recreativos, conta xa con 7.400 metros cadrados cedidos para este uso polos veciños de Feáns e con 25 persoas inscritas como solicitantes dunha parcela.

O traballo feito nas últimas semanas polo colectivo de arquitectos Desescribir forma parte do proxecto A cidade dos barrios, impulsado pola delegación coruñesa do Colexio de Arquitectos de Galicia e dirixido polo estudio de arquitectura MMASA. Tras os contactos establecidos cos veciños do val de Feáns e a visita realizada polos primeiros interesados en cultivar unha horta nesa zona, os promotores desta actuación deron onte conta dos resultados obtidos ata agora.


Interesados en el cultivo de las huertas, junto a la caseta para herramientas instalada en Feáns. / c. pardellas

As máis de 2.000 visitas contabilizadas en só dúas semanas polo blog aberto polos responsables de Hortas na cidade é un reflexo do interese que suscita a posibilidade de dispoñer dunha pequena porción de terreo na que practicar as habilidades como agricultor.

Felipe Riola, un dos membros de Desescribir, explicou que os inscritos nesta iniciativa son persoas de moi diferentes características, tanto xente nova como maiores e con experiencia agrícola ou cunha carencia absoluta de coñecementos sobre este traballo. O arquitecto detallou que as parcelas serán cedidas de forma totalmente gratuita e que o seu tamaño variará entre os 40 e os 60 metros cadrados, xa que algunhas delas serán cultivadas de forma colectiva por familias ou grupos de amigos.

Na actualidade xestiónase a constitución dunha asociación de usuarios destas hortas, cunha superficie que se confía en incrementar no val nos próximos meses.

3/12/09

Conclusións do obradoiro Hortas na cidade.

Hoxe serán presentadas as conclusións do segundo obradoiro do colectivo de arquitectos desescribir, Hortas na cidade. A iniciativa desenvolveuse en Feáns, no val de Mesoiro, coa intención de conservar e promover a riqueza agraria degrada a paso de xigante nos últimos anos.

Tras a exposición das conclusións, o xeográfo portugués Alvaro Domingues impartirá unha conferencia sobre o encontro entre o rural e o urbano.

Sede da fundación Caixa Galicia (Cantón Grande 21-24, A Coruña)
Xoves 3 de decembro ás 19:30

O Concello aproba o novo PXOM da cidade

La Voz de Galicia
1/12/09
A Coruña.
EFE.

O Concello da Coruña aprobou hoxe de maneira inicial o novo Plan Xeral de Ordenación Municipal (PXOM) da cidade cos votos favorábeis de PSdeG e BNG e o voto en contra dos concelleiros do Partido Popular.

Nun pleno extraordinario celebrado esta mañá no Concello, a concelleira de Urbanismo, Obdulia Taboadela, cualificou o documento como o plan "da transparencia, da participación e da información" que é, máis que unha ferramenta urbanística, "unha guía de acción para construír a cidade que queremos".

Entre as súas principais características, Taboadela citou a aposta pola mobilidade e o transporte público, polas zonas verdes, pola rebaixa da edificabilidade, pola construcción de vivenda de acollida, pola potenciación da universidade e dos hospitais como polos "fundamentais" do desenvolvemento ou polo mantemento dos núcleos tradicionais, entre outros aspeitos.

Tamén figura a aposta "decidida e continuada" por "reverdecer a cidade" e potenciar o sistema de parques perimeitrais.

Obdulia Taboadela fixo especial mención aos plans especiais de transformación, que contemplan a liberación de terreos para devolver aos cidadáns máis de cen hectáreas.

Entre as actuacións contempladas nestes plans, destacoua a construcción da estación intermodal e a conseguinte creación dunha zona de lecer e de equipamentos públicos nos terreos da actual estación de autobuses, a creación dunha nova fachada marítima nas instalacións portuarias de San Diego ou o futuro da Fábrica de Armas.

Pola súa banda o concelleiro nacionalista Mario López Rico outorgou "un notábel alto" ao documento, que cualificou de "ambicioso, realista e xusto", ademais de se un "bálsamo" para as feridas do "urbanismo selvaxe" dos últimos anos.

López Rico considerou que a posta en marcha do plan permitirá á cidade recuperar o liderado en Galiza e facelo en "clave" metropolitana".

Tamén esixiu ao principal partido da oposición, o PP, que non utilice o PXOM como arma electoral ao tempo que cualificou o seu posicionamento respeito ao documento de "brandiño e cobarde" malia ser "o mellor plan que nunca tivo A Coruña".

Desde o PP, o concelleiro Miguel Lorenzo indicou que o Goberno municipal conta con "todo o apoio" da súa formación para as grandes infraestruturas, a pesar de que, apuntou, "chegan tarde", e tamén considerou "acertada" a decisión de escoller a Joan Busquets para definir o PXOM.

Porén, afirmou que o bipartito ten un problema "grave" ao seu xuízo: a financiación. Atrubuíu este aspeito, en parte, á carencia de liderado que, segundo el, teñen para captar fondos.

Durante a súa intervención, o concelleiro do PP pediu explicación a Taboadela sobre as suxerencias presentadas ao documento que hoxe se sometía a votación, así como pola aprobación de sete convenios urbanísticos tras a aprobación do texto por parte da Xunta ou pola financiación do devandito.

Finalmente o PP votou en contra da aprobación inicial do documento, unha actitude que Taboadela tildou de "esquizofrenía inteligible", ao tempo que criticou o portavoz municipal do grupo popular, Carlos Negreira, por ser un "convidado de pedra" e "pasar" do plan e da cidade.

Tras a súa aprobación, o plan será remitido ás distintas administraciójns para que elaboren os correspondentes informes sectoriais e pasará a exposición pública.








29/11/09

Xa abonda tanta hipocrisía

Periodicamente saen publicadas en determinados xornais noticias sobre a Área Residencial Universitaria de Elviña, afirmando que a súa construción é inminente ou denunciando as trabas que pon a Administración na súa execución.

Nesas noticias frecuentes alúdese sempre á inexistencia dunha residencia pública no campus coruñés e á existencia de “infravivendas” para universitarios. Algún despistado podería crer, lendo o xornal, que os universitarios viven en “chabolas” preparadas para seren as súas vivendas. Mais é difícil que alguén sexa o suficientemente parvo para pensar que a necesidade dunha residencia universitaria está xustificada nun suposto chabolismo universitario. Ou, mirándoo do revés, é difícil pensar que haxa alguén tan memo como para fundamentar a necesidade dunha residencia universitaria na existencia de chabolas universitarias.

Cuestión diferente a esa visión sesgada sobre as chamadas “infravivendas” é o abuso no alugueiro a estudantes universitarios, tanto na Zapateira como na cidade.

Ben distinto ao argumento memo ou malintencionado, é a necesidade dunha residencia pública nun campus que acolle estudantes de diferente puntos do país. Porque habendo residencias universitarias, unha delas concertada coa propia universidade da Coruña, ninguén dubida do oportuno de ter unha residencia de carácter público.

E tras dicir isto
, esas mesmas noticias nunca falan sobre todos aqueles que perden as casas para que o avance do campus sexa posible, nin sobre os abusos aos que se ven sometidos.

Sobre esta cuestión entran moitas valoracións posibles de por que motivo nin a prensa nin a Universidade ven como un problema o desaloxo de veciños de Elviña. Nós podemos pensar que é un problema non poder adquirir nin un apartamento de 20 m2 co que che dan por unha casa de 100 m2, e outros poden pensar que é o máis xusto do mundo. Agora ben, expulsar a xente do seu entorno para poñer outra diferente ten un nome, especulación.

E alén dos criterios subxectivos, hai unha realidade contrastable, pois a normativa legal para o campus universitario vincula a súa área residencial ao realoxo dos veciños.

E pasando por alto a hipocrisía mediática e institucional, preguntámonos cando vai ser que a Universidade da Coruña teña a ben cumprir a normativa legal e realoxar os veciños expropiados.

«Pasou un ano máis e seguimos sen ter nin unha soa praza de residencia pública»

La Voz de Galicia
29/11/2009
A Coruña
Ana Lorenzo.
Xosé Lois Martínez, vicerreitor de Infraestruturas da Universidade da Coruña e un dos principais impulsores da residencia universitaria coruñesa, lamenta que todos os trámites para a construción deste complexo se dilatasen tanto no tempo, e que o proxecto aínda non estea en marcha. «Pasou un ano máis e seguimos sen ter nin unha soa praza de residencia pública na Coruña. Este é un tema que ten unha urxencia enorme», afirmou o responsable universitario.

Martínez recordou que, ademais dos prexuízos que se lle están causando aos estudantes da Universidade da Coruña, que teñen que alugar un piso ao prezo do mercado libre, os atrasos na construción desta residencia tamén teñen efectos sobre a economía da cidade. Segundo explica o vicerreitor de Infraestruturas, «nunha época de crise actual como a que está caendo, habería que resolver canto antes a adxudicación desta obra, non só polos membros da comunidade universitaria, senón polos postos de traballo que se crearán non sector da construción».

Cando finalmente se levante a área residencial de Elviña, a Universidade da Coruña contará con 650 prazas de aloxamento público, que non serán suficientes para dar solución aos preto de 14.000 estudantes e profesores cos que conta esta institución académica. Segundo os cálculos realizados polos responsables municipais e universitarios, preto de 10.000 persoas teñen que alugar un piso na cidade para pasar os nove meses do curso escolar, polo que se estima que se precisarían unhas 2.500 prazas de residencias universitarias para atender as necesidades máis urxentes.

A área residencial de Elviña adxudicarase a principios do 2010

La Voz de Galicia
29/11/2009
A Coruña.
Ana Lorenzo. A Coruña.
Logo de distintos atrancos e de case catro anos de trámites, a área residencial da Universidade da Coruña podería empezar a construírse a principios do próximo ano, data na que se estima que se realizará a adxudicación da obra, segundo informaron fontes da Consellería de Medio Ambiente, Territorio e Infraestruturas. De feito, nos orzamentos do 2010, a Xunta xa dispuxo unha partida de 10,7 millóns de euros para comezar a levantar esta residencia, a primeira pública coa que contará a UDC, a única universidade de Galicia que ata o momento non dispuña deste tipo de equipamentos.

Foi precisamente por este motivo polo que, no ano 2006, a anterior titular da Consellería de Vivenda, a nacionalista Teresa Táboas, xunto cos responsables da institución académica coruñesa, iniciaron os trámites para que este conxunto residencial fose unha realidade. O primeiro obstáculo co que se atoparon foi a planeamento urbanístico da cidade -datado no ano 1998- no que houbo que realizar unha modificación para poder construír este edificio. Despois de que a corporación municipal aprobase este cambio no PXOM, o acordo remitiuse a distintas consellerías para que desen o visto e prace, trámite que non superou cando chegou a Política Territorial. Este departamento autonómico detectou unha serie de incorrecciones e deficiencias, polo que devolveu o documento urbanístico ao goberno local coruñés para que as solucionase. Todo este proceso dilatouse no tempo entre os meses de febreiro e novembro do ano pasado, cando finalmente Política Territorial daba a súa aprobación definitiva á modificación do PXOM.
Infravivendas

Por estas mesmas datas, o descubrimento dun centenar de infravivendas no campus da Zapateira axudou a que se acelerasen os trámites para a construción da residencia universitaria. Así, ese mesmo mes de novembro solicitábase a licenza municipal para comezar as obras, e en decembro publicábase no Diario Oficial de Galicia a licitación da actuación, que contaría cun orzamento total de 24,5 millóns de euros e un prazo de execución que oscilaría entre os 24 e os 36 meses.

Vintetrés empresas presentáronse a este concurso, que se estimaba que estaría resolto no pasado mes de abril para iniciar as obras. Con todo, o cambio de Goberno na Xunta atrasou este último paso, ao que tamén se sumou o desacordo de moitos veciños afectados polas expropiacións das súas terras.

Finalmente, e segundo acaba de anunciar a Consellería de Medio Ambiente, Territorio e Infraestruturas, todos os trámites parece que se resolveron, e que a primeira pedra da nova área residencial de Elviña se colocará a principios do próximo ano.

24/11/09

Hortas na cidade

Os coruñeses terán dous meses para presentar alegacións ao PXOM

La Voz de Galicia
24/11/2009
A Coruña

Losada desvelará hoxe se admite as correccións propostas
pola Xunta no informe previo ao planeamento


R.D.S. A Coruña. A xunta de goberno do Concello da Coruña aprobará hoxe o Plan Xeral de Ordenación Urbana elaborado polo equipo do urbanista Joan Busquets, tras a revisión realizadas a consecuencia do informe previo remitido o 31 de agosto pasado pola Consellería de Medio Ambiente.

A intención do executivo municipal é acelerar ao máximo a tramitación do documento, de forma que se remitirá de inmediato ao pleno para a súa aprobación incial. Será daquela cando se someta a exposición pública, abríndose un período de dous meses para que os coruñeses presenten as alegacións que consideren. Despois, o planeamento deberá volver a remitirse á Xunta para recibir a súa aprobación definitivsa antes de pasar de novo polo pleno. As previsións do Concello apuntan a que a mediados do 2010 estea plenamente vixente o PXOM.

Coa aprobación en xunta de goberno desvelarase até que punto se teñen consensuado as modificacións presentadas pola Administración autonómica no informe previo, que o alcalde cualificou de puntualizcións técnicas menores que non desautorizan o espíritu do planeamento.

Daquela Medio Ambiente calificara de irreal a financiación do PXOM, supeditada a transformacións de áreas de solo singulares -o porto, as estacións de buses e tren, ou a Fábrica de Armas- cuxo desenvolvemento dependería de convenios con outras Administracións aínda sen formalizar e aos que, segundo a norma autonómica, non se pode recurrir como instrumentos de ordenación territorial nin tampouco utilizarse para recalificacións que requiren unha modificación do plan.

Outro dos aspectos incluídos na revisión inicial da Xunta tiña que ver coa previsión de construcción de novas vivendas, non sustentada, a xuízo dos técnicos autonómicos, sobre unha base real. O cálculo, criticaron, realizárase tomando como base a auxe inmobiliaria do período 1999-2007.




13/11/09

Un tercio das entidades veciñais oponse á campaña en favor do L.

La Opinión de A Coruña
12/11/2009
A Coruña
A consulta sobre a cooficialidade do topónimo en galego
e castelán que promove a federación de veciños enfrenta aos asociados
MARCOS OTERO / PABLO LÓPEZ A CORUÑA. A oposición interna á consulta cidadá sobre o topónimo que promove a Federación de Asociacións de Veciños da Coruña e Área Metropolitana aumenta a medida que transcorren os días. Se o martes, cando a dirección da federación anunciou a súa intención de iniciar unha campaña de recollida de sinaturas en favor da cooficialidade en galego e castelán do nome da cidade, eran cinco as asociacións contrarias á consulta, onte uníronselle outras seis. Á oposición das entidades de Monte Alto, Os Rosais, Agra do Orzán, Os Castros e San Pedro de Visma sumáronse a de Bens, O Portiño, a Cidade Vella, Mesoiro e Vío, Elviña-Castro e As Xubias, o que eleva a once a cifra de agrupacións opostas á iniciativa da federación.
Once das trinta asociacións adscritas ao órgano que as reúne na cidade[sic]. O resto secunda a consulta exposta pola federación, nuns casos baseándose no clima favorable que ao seu xuízo existe na cidade e noutros na potestade da federación para cuestionar os veciños sobre unha cuestión que lles afecta.
Pero os opositores responden que nin está nas competencias dunha asociación veciñal promover este tipo de consultas, nin supoñe un problema de especial relevancia, nin moito menos se encontra entre as preocupacións cotiás dos cidadáns. E ademais, protestan, ninguén desde a federación lles informou con anterioridade sobre a posibilidade de celebrar a consulta entre os veciños. Independentemente do que a cada asociación representada na federación lle poida parecer, vén dicir a presidenta da Asociación de Veciños da Cidade Vella, Rosa Quiroga, o más conveniente sería consultalo previamente con todos os asociados. Ou, no seu defecto, informar cando menos. Coa decisión xa tomada, Rosa Quiroga sitúase entre os que consideran que "a misión" da federación non é a de recoller rúbricas cidadás dirixidas a lograr a modificación dunha lei de carácter autonómico. Porque, aínda que o fin último sexa conseguir que tanto a forma castelá como galega do topónimo sexan oficiais, as sinaturas van encamiñadas a cambiar a Lei de Normalización Lingüística do ano 1983. "A Lei de Normalización Lingüística aposta claramente pola forma oficial galega dos topónimos de Galicia. Esta lei foi aprobada por unanimidade polo Parlamento de Galicia para por fin á persecución dos topónimos galegos, moitas veces castelanizados de forma inculta", replicou onte a asociación de vecinos de Elviña-Castro nun comunicado.
As críticas desta entidade foron máis alá e apuntaron directamente á presidenta da federación de asociacións de veciños, Luisa Varela, á que acusan de ser a principal impulsora da iniciativa. Ao igual que outras das asociacións opostas á campaña para a recollida de sinaturas en favor do L no topónimo, a asociación de Elviña-Castro observa que a decisión da iniciativa corresponde de maneira "persoal e unilateral" á súa presidenta. O obxectivo, de acordo a esta entidade, é "lavarlle a cara ao grupo municipal do PSOE que votou en contra do topónimo La Coruña".
As asociacións partidarias da consulta rexeitan calquera tipo de propósito oculto na campaña que pretenden desenrolar na cidade e que arrancará esta mesma mañá en Santiago de Compostela coa solicitude ao Parlamento galego do permiso necesario para poder reunir as sinaturas e que estas teñan posteriormente consideración legal. A directiva da federación nega do mesmo modo que non se informara a todas as entidades asociadas; ben fora por correo convencional ou electrónico, comunicóuselles a todas as agrupacións a decisión adoptada.
Os opositores, en cambio, reprochan á xunta directiva da federación de asociacións de veciños que non tivese a mesma sensibilidade por outros asuntos que afectan á cidade.

11/11/09

Comunicado de prensa dos Rexumeiros sobre a consulta do topónimo

Co presente comunicado a Asociación de Veciños de Elviña e Castro de Elviña, quere mostrar a súa posición á consulta promovida pola Federación de Asociacións de Veciños a favor de oficializar o topónimo castelán da Coruña.

1. A lei de Normalización Lingüística aposta claramente pola forma oficial galega dos topónimos de Galicia. Esta lei foi aprobada por unanimidade polo Parlamento de Galicia, para poñer fin á persecución dos topónimos galegos, moitas veces castelanizados dunha forma inculta.

2. En dúas ocasións levouse ao pleno municipal da Coruña o asunto de recoller como nome cooficial o topónimo "La Coruña". En ningún dos dous plenos se acadou un consenso, optándose polo topónimo legal A Coruña.

3. Entendemos que a consulta sobre o topónimo promovido pola Federación de Asociacións de Veciños parte dunha decisión persoal e unilateral da súa presidencia co obxectivo de lavarlle a cara ao grupo municipal do PSOE que votou en contra do topónimo "La Coruña", co alcalde á cabeza, e que logo lle enviou unha carta ao presidente da Xunta para que contemple o topónimo na súa forma castelanizada.

4. Lamentamos que habendo conflitos veciñais moito máis graves, a Federación se dedique a enredar con obxectivos partidistas, en lugar de solucionar os problemas do movemento veciñal.

Informática e Camiños contarán cun novo edificio compartido

La Voz de Galicia
A Coruña
10/11/2009

Ana Lorenzo.
A falta de espazo nas facultades de Informática e Camiños levou á vicerreitoría de Infraestruturas da Universidade da Coruña a deseñar un novo edificio anexo, que servirá para albergar os servizos de investigación, docencia e despachos dos profesores de ambos os dous centros. O proxecto, que foi redactado por César Portela Fernández, ten un orzamento próximo aos 4 millóns de euro, e será executado por módulos, inciándose a construcción do primeiro nas semanas vindeiras. A nova construcción (Fte. La Voz de Galicia)

Segundo explicou o vicerreitor responsábel deste iniciativa, Xosé Lois Martínez, "é un edificio que aglutina a investigación de Camiños e de Informática, e supón a creación dun edificio ligado ao concepto de universidade que plantexa o novo espazo europeo de ensinanza superior, e que supera a idea de ter un centro para cada titulación". Lembrou que, sobre todo a Facultade de Informática, "ten un problema gravísimo de falta de espazos", que se vai solventar con este novo inmoble, que se situará no lugar que agora ocupa o aparcamento de ambos centros universitarios (pola súa entrada principal), nunha zona moi próxima ao parque tecnolóxico.

Precisamente da posíbel conexión entre ambas construccións falou onte Xosé Lois Martínez, quen anunciou que grazas a un sistema de elevadores se resolverá o problema do desnivel de 20 metros de altura que existe entre o centro anexo das facultades de Informática e Camiños e os edificios que integran o Parque Tecnolóxico. Outra das novidades que traerá consigo a creación deste inmóbel compartido será a construcción dunha pasarela que permetirá o tránsito de profesores e alumnos desde alí até os centros universitarios. Ademais, no futuro, "e recollendo a proposta de Joan Busquets, se pretende facer un corredor que chegue desde estas facultades ata a estación de ferrocarril, enlazando ao Campus Center", explicou o vicerreitor de Infraestruturas.

Outros proxectos en marcha
(seguir lendo en
http://www.lavozdegalicia.es/coruna/2009/11/10/0003_8095678.htm)

22/10/09

A Coruña acolle desde hoxe unhas xornadas sobre as residencias universitarias

La Voz de Galicia
22/10/2009
A Coruña

EFE. A Coruña

O concelleiro de Rehabilitación Urbana, Mario López Rico, foi canda o delegado provincial da Xunta na Coruña, Diego Calvo, o encargado de presidir a inauguración das xornadas.

A sede da Fundación Caixa Galicia da Coruña acolle hoxe e mañá unhas xornadas sobre as áreas residenciais universitarias nas que se darán a coñecer experiencias de xestión, promoción e construcción desenroladas noutros países.

O concelleiro de Rehabilitación Urbana, Mario López Rico,
foi canda o delegado provincial da Xunta na Coruña, Diego Calvo, o encargado de presidir a inauguración das xornadas, nas que se abordará o problema do aloxamento do estudantes desde as diferentes perspectivas.

Desde o Concello destacaron nun comunicado que a incorporación das universidades galegas ao Espazo Europeo de Educación Superior traerá consigo un incremento dos alumnos foráneos, o que supón un novo reto que estas institucións terán que afrontar.

Asimesmo recordaron que os traballos de investigación realizados pola Universidade da Coruña (UDC) descobriron a existencia de máis dun cento de infravivendas destinadas a estudantes, o que atribúen á presión que se deriva da demanda de aloxamento universitario así como á carencia de políticas públicas encamiñadas a solventar esta deficiencia.

Neste sentido, explicaron que nas xornadas se analizarán, entre outros aspectos, a dimensión social da demanda de vivenda por parte dos estudantes, o papel e resposta das cidades fronte a esta situación, a importancia de ofertar espazos de calidade e asequíbeis, así como dar a coñecer os modelos existentes de xestión, promoción e construcción de países como Finlandia, Alemaña e Reino Unido xunto con experiencias españolas.

Negreira afirma que os orzamentos da Xunta inclúen a construcción da Residencia Universitaria de Elviña

Os orzamentos da Xunta para 2010 foron presentados esta semana e foi motivo de valoración polas distintas forzas do noso concello. Estes orzamentos inclúen partidas concretas para obras como a Terceira Vía ou o Parque Ofimático.

Este martes en rolda de prensa o portavoz do PP coruñés, Carlos Negreira, facía a valoración dos orzamentos, os que cualificaba de moi positivos. Durante a explicación afirmou que a inversión da Xunta para a cidade tamén contempla a construcción da residencia universitaria de Elviña.


Negreira explicou que dentro da partida xenérica para vivenda, que ascende a 12 millóns de euros. Serán oito millóns os reservados á Área Residencial Universitaria.

E coma sempre queda a pregunta no aire, alguén se preocupará de solucionar o problema de vivenda dos veciños de Castro de Elviña que quedan sen casa pola construcción da residencia universitaria?

21/10/09

Máis de 50.000 persoas na meirande marcha polo galego da historia

El País
19/10/2009
Galicia

Silvia R. Pontevedra. Santiago

"No sabía que en Galicia hubiese tantos gallegos", comentáballe ao vixiante do aparcamento da Praza de Galicia un dos turistas que quedaron atrapados co seu coche máis de media hora, sen poder saír, porque a riada de manifestantes atascaba a rúa. "Estes, mañá, apúntanse a Galicia Bilingüe", bromeaba algún dos que ían na marcha ao ver a ringleira de autos que se perdía dentro do garaxe. Enriba da porta da saída de vehículos, nunha pantalla luminosa, o Concello de Santiago pasaba ese anuncio no que Gadis convida a vivir "como galegos".


Miles de persoas ateigan a praza da Quintana. EFE

A xente non deixaba de pasar, e non deixaría de facelo até tres horas máis tarde, cando a Fran Rei (vicepresidente da Mesa e coordinador de Queremos Galego, a plataforma que convocou o acto), o chamaron ao móbil para avisalo de que aínda había grupos saíndo da Alameda. Unha parella de municipais comentaba durante a marcha que debían de ser "máis de 50.000 persoas", e logo confirmaba a cifra, unha vez supervisada polos mandos, o axente ao que onte pola tarde lle tocaba garda ao teléfono: "Aquí deixáronme anotado 50.000". A organización, abrumada polas masas en movemento, tardou tempo en botar as súas propias contas. "Cando menos, 60.000 dixeron primeiro", mais logo repasaron os seus cálculos, e en vista dos moitos que se quedaron sen escoitar o manifesto da Quintana, terminaron por dicir que 100.000.

Despois dos integrantes da coordinadora Queremos Galego, avanzaba termando dunha das pancartas da cabeza a plana maior do BNG. E, aproximadamente a medio quilómetro de distancia, perdidos entre o xentío, secundaban a protesta os socialistas galegos, co ministro de Xustiza, Francisco Caamaño, na comitiva.

Manuel Vázquez, secretario xeral do PSdeG, que agardou ao sábado para confirmar a súa presenza, quitáballe importancia á súa posición retrasada na marcha. Non é que estivesen gardando distancias, é que se lles meteu "todo o mundo diante". Por iso, ao final, quedáronse sen escoitalos. Iso xa pasara o 17 de maio, na anterior manifestación polo galego (á que segundo a policía asistiron 10.000 persoas) pero desta volta todo o mundo coincidía en había máis xente. Queremos Galego conseguiu mobilizar, incluso, aos grupos de defensa da lingua que en tempos adversos van agromando no Berzo, en Estremadura, en Andorra ou en Canarias. Á vez que tiña lugar a manifestación en Santiago, celebrábase unha reunión en pro do idioma propio e en contra das políticas e Feixóo en Bruxelas, e o Terzo da Fala de Bos Aires mandaba un comunicado excusando a súa presenza por estar a "10.000 quilómetros".

Máis en:
http://www.elpais.com/articulo/Galicia/50000/personas/mayor/marcha/gallego/historia/elpepuespgal/20091019elpgal_1/Tes

19/10/09

A Universidade solicítalle á Xunta que lle permita xestionar a residencia estudiantil

El Ideal Gallego

18/10/2009

R.R. A Coruña

O vicerreitor de Infraestruturas, Xosé Lois Martínez, informou onte de que hai uns 15 días que a Universidade remitiu ao Instituto Galego de Vivenda e Solo unha proposta de convenio para asumir a xestión, o mantemento e a conservación da nova residencia universitaria de Elviña, que aínda está por construír.

Xosé Lois Martínez explicou que o proxecto está unicamente pendente da adxudicación da obra á empresa contructora, unha das 23 que accederon ao concurso público cuxo prazo de presentación finalizou o pasado febreiro. O vicerreitor recordou que a obra inclúe 310 unidades habitacionais e dará aloxamento a 620 estudantes e profesores, ademais de dúas grandes prazas a cada un dos lados.

Licenza > Pola súa parte, o concelleiro de Rehabilitación Urbana e Vivenda, Mario López Rico, afirmou que "por parte municipal está todo totalmente resolto e xa conta coa licenza de obra". De feito, ambos os dous mostraron a súa confianza en que a resposta por parte do goberno galego sexa positiva.

"É inevitable que a resposta observe a altura da importancia da cidade e que equilibre o sistema universitario porque xa hai universidades cunha oferta importante de aloxamento e agora tócalle á Coruña ser beneficiaria", manifestou o vicerreitor.

En canto ás infravivendas que se descubriron hai uns meses preto do campus universitario e que os donos habilitaran como cuartos para estudantes, López Rico explicou que é un asunto que pertence á Concellaría de Urbanismo, pero anunciou que se están a facer os trámites para "legalizar o legalizable e ilegalizar o ilegalizable, pero nunca como residencias universitarias".

Xornadas > O concelleiro de Rehabilitación Urbana e o vicerreitor de Infraestruturas presentaron tamén as xornadas Áreas Residenciais Universitarias, que terán lugar os días 22 e 23 de outubro na sede da Fundación Caixa Galicia e nas que se debaterá sobre a realidade do aloxamento universitario na cidade, abordando a cuestión dende diferentes perspectivas.

O concelleiro de Rehabilitación Urbana e o vicerreitor de Infraestruturas

Como explicou Xosé Lois Martínez, a adaptación das universidades galegas ao Espazo Europeo de Educación Superior implica que "a Universidade ten que ser europea e a cidade tamén". Deste xeito, a institución universitaria terá que ofrecer servizos a niveis competitivos.

E unha das claves será a vivenda, unha das materias pendentes na cidade coruñesa, onde non hai suficientes prazas nas residencias universitarias. Esta problemática repercute no mercado da vivenda e, sobre todo, nos aluguer.

"A Coruña é unha cidade con alugueres moi altos que penaliza ao estudante, que paga un aluguer máis alto que noutras cidades e, como non hai residencias abondo, a demanda de alugueres aumenta e isto afecta negativamente ao mercado", explicou Martínez.

Mario López Rico admitiu que os problemas non se trataron ben, o que levou consigo a aparición de infravivendas, e recoñeceu que atender a demanda duns 10.000 estudantes anuais é unha preocupación compartida polo goberno municipal e a Universidade.

Nas xornadas, ademais, coñeceranse os modelos de países como Finlandia, Alemaña ou Reino Unido, así como experiencias españolas, e acudirán representantes das universidades de Vigo e Santiago.

17/10/09

A avenida da Universidade leva dous anos para ser recepcionada

La Voz de Galicia
17/10/2009
A Coruña



Ana Lorenzo. A apertura da avenida da Universidade tivo máis prazos incumpridos que os do AVE. Aínda que está finalizada desde hai máis de dous anos, os pequenos retoques que lle faltaban para ser recepcionada polo Concello foron demorando a súa inauguración oficial todo este tempo, a pesar de que hai un ano se abriron case todos os tramos de xeito provisional.
O motivo foi a celebración do primeiro salón do automóbil, que congregou nas inmediacións de Expocoruña un gran número de visitantes; e, para evitar problemas de tráfico, optouse entón por abrila. Ata ese momento, só entraran en funcionamento dous carrís desta vía -en sentido de regreso a Alfonso Molina-, e que se tiveron que habilitar de xeito urxente en xullo do 2007, despois de que se viñese abaixo a estrada que bordeaba o Coliseo, como consecuencia das escavacións realizadas nun edificio anexo que se estaba levantando.


Cambios

No último ano, cando xa están abertos os catro carrís de forma provisional, a avenida foi completándose aos poucos e conseguiu ter pasos de peóns, luz nos farois e, ata novas varandas, que o Concello obrigou a instalar á xunta de compensación que urbaniza todo o polígono residencial de Someso, despois do tráxico accidente que tivo lugar en marzo do ano pasado, e no que perdeu a vida unha turista tras ceder unha pasarela do paseo marítimo.

O vindeiro martes abrirase o novo centro Espazo Coruña, que terá un dos seus accesos pola avenida da Universidade, e que xa nestes días viuse ateigada de camións que viñan descargar mercancía para esta superficie comercial. Desde a xunta de compensación que realiza as obras confían en que, no prazo dun mes, se poida entregar definitivamente esta estrada ao Concello, posto que somentes falta esperar a que Unión Fenosa autorice o enganche que dá servizo aos semáforos situados nas inmediacións da rotonda do campus universitario de Elviña. Os trámites que houbo que realizar para colocar esta rede semafórica, na que foi preciso instalar previamente un transformador, atrasaron aínda máis a entrega da avenida ao goberno municipal. A estas obras engádense as que se están realizando á altura de Expocoruña, onde se constrúe unha nova marquesiña de autobuses.

O Concello comprométese a debater as demandas dos veciños sobre o PXOM

La Opinión de A Coruña
16/10/2009
A Coruña/Metro



Gemma Malvido/ A Coruña. Avogan por unha cidade feita por e para os barrios e é por iso polo que decidiron botarse á rúa, bolígrafo en man, para anotar as propostas que cada veciño ten para o lugar que habita. O colexio de arquitectos, o Concello e Caixa Galicia comezaron onte coa primeira fase do proxecto A cidade dos barrios.

Aseguraron onte o concelleiro de Rehabilitación, Mario López Rico, e a edil de Servizos Sociais, Silvia Longueira, que as conclusións que se extraian deste estudo -no que os veciños poderán pedir, por exemplo, que lles amplíen as beirarrúas, que lles poñan bancos ou máis aparcadoiros- serán incluídas nas sesións de debate sobre a modificación que o arquitecto catalán Joan Busquets ideou para a cidade.

O presidente do Colexio Oficial de Arquitectos de Galicia na Coruña (COAG), Manuel de la Iglesia, avogou onte por unha mellor utilización dos espazos privados que fan unha función pública, como son as fundacións ou a terraza da sede coruñesa do colexio de arquitectos.

O plánning de traballo deste proxecto no que os barrios cobran protagonismo e singularidade está xa marcado. Dende onte, os arquitectos de Ergosfera traballan cos veciños de Matogrande, Barrio das Flores e Monelos para anotar as carencias que cada veciño de xeito individual -non fala a asociación veciñal por todos os residentes- quere detallar do lugar no que habita. Mañá realizarán unha pequena actuación, que o arquitecto Luciano Alfaya definiu coa posibilidade de "poñer bancos" e, o próximo xoves, na Fundación Caixa Galicia, se lles presentarán aos veciños as conclusións do estudo cunha conferencia. O 10 de decembro, presentaranse os resultados dos barrios de Visma, ou Portiño, Os Rosales, Monte Alto, Adormideras, Novo Mesoiro, San Cristovo e Elviña e non será ata setembro do próximo ano, cando se xunten as conclusións de todos os barrios, e se dea a coñecer o documento que o Concello "intentará" incluír totalmente na redacción da modificación do plan xeral. Os arquitectos reivindícanse como mediadores entre políticos e veciños.

Ferido ao chocar cun coche aparcado en Castro de Elviña

La Voz de Galicia
12/10/2009
A Coruña



Un mozo sufriu na mañá de onte feridas de diversa consideración no accidente de tráfico ocorrido en Castro de Elviña, xunto ao campus universitario.

O sinistro produciuse ao redor das nove e vinte da mañá, cando o mozo, de iniciais J.C.E. e 24 anos de idade, por causas que se descoñecen perdeu o control do vehículo e saíuse da estrada á altura do número 4. O automóbil foi parar contra outro vehículo que se atopaba aparcado na beiravía.


Ata o lugar do suceso desprazouse un equipo de urxencias sanitarias do 061, que prestou os primeiros auxilios ao ferido e decidiu trasladar ao mozo en ambulancia ao servizo de urxencias do Complexo Hospitalario Universitario A Coruña.

Á zona tamén se trasladou un equipo de atestados da Policía Local. Segundo confirmaron os axentes municipais, o condutor do vehículo deu positivo na proba de control de alcoholemia.

6/10/09

Tráfico acabará de pintar os pasos de cebra da estrada do Martinete e en Castro de Elviña

La Voz de Galicia
2/10/09
A Coruña
A Concellería de Tráfico e Seguridade Cidadá terminará de pintar nos próximos días os pasos de peóns na estrada do Martinete. Asimesmo, xa ten comprometido o mesmo traballo en Castro de Elviña e procederá a revisar a sinalización de Palavea.
Ademais, a área que dirixe Florencio Cardador ten previsto completar, ao longo de 2010, os sinais dos pasos de cebra que indican ao peón o lugar cara ao que debe mirar, e tamén se instalarán sinais verticais. Desde Tráfico lembran o recente asfaltado e pintado da rúa Juan Flórez.

23/9/09

Gueto ou campus

La Opinión de A Coruña
20/09/09
A Coruña/ Metro

ANA RODRÍGUEZ / A CORUÑA. A universidade coruñesa terá en breve o seu propio plan Busquets. Un plan director para ordenar o territorio universitario e adaptar os seus espazos á nova educación superior europea. O principal asesor do documento será un reputado arquitecto, o maior especialista español na planificación de campus, Pablo Campos Calvo-Sotelo. A pasada semana presentou antes os responsábeis da institución da Coruña os primeiros pasos da redacción do proxecto. Comézase por unha ánalise patolóxica. Xa hai un primeiro diagnóstico: a cidade e a universidade víranse as costas. E máis: non hai residencias públicas, nin espazos de socialización, nin comunicación entre centros...a vida estudantil é escasa e os campus quédanse tristes e sos, absolutamente insulsos, cada vez que chega o mediodía do xoves.

A intención da Universidade da Coruña é que novo plan director -o terceiro que se propón en España tras Alcalá e Cartagena- adapte os seus espazos ao novo modelo que marca Boloña, comezando pola propia estructuración das súas facultades.

"Boloña formula unha relación profesor-alumno máis próxima, e as aulas tradicionais, con 200 ou 300 prazas, xa non valen, valen para clases maxistrais, pero iso non é Boloña", explica o vicerreitor, Xosé Lois Martínez, que avanza algunha das liñas que seguirá o plan director.

Máis información en laopinioncoruna.es

16/9/09

O castro de Elviña "prepárase" para unha nova campaña de escavacións no outono

El Ideal Gallego
14/09/09
A Coruña

O Concello segue avogando pola conservación do castro de Elviña sacando a concurso a contratación de dous servizos que contribuirán á mellora do ámbito. A intervención sobre a vexetación da zona, así como a presenza dun servizo de vixilancia para as próximas escavacións, son os proxectos máis inmediatos que facilitarán a súa conservación, así como o traballo dos arqueólogos.

Todos os labores executaranse unha vez pasado o período estival e baixo a dirección do director do Museo Arqueolóxico e arqueólogo, José María Bello. Este afirma que o principal obxectivo é limpar a maleza da zona, sobre todo daquelas partes periféricas que, debido á falta de presuposto, quedaron máis abandonadas. Iso si, tamén se procurará manter determinadas especies: "Cortaranse as árbores que non son autóctonas, e deixaremos outras coma os castiñeiros ou os loureiros", alega Bello.

A pesar da dificultade dos traballos debido á pendente do lugar, así como á súa dimensión, a vantaxe estará en que se poderán realizar os labores de poda durante o período dun ano.


Financiamento > Este proxecto esta cofinanciado nun 75% polo Ministerio de Fomento con cargo ao programa de rehabilitación do Patrimonio Histórico. O resto, será sufragado polo Concello. En total, os traballos de intervención sobre a vexetación contarán cun orzamento final de 195.123 euros que se adxudicaron, provisionalmente a Malveción S.L., por ser a proposición máis vantaxosa á hora de aplicar os requisitos establecidos nos pregos reguladores da contratación.

Pola súa banda, os servizos de vixilancia, contarán cun fondo de 59.653 euros e están adxudicados, a día de hoxe, a Protección de Patrimonios. Estes servizos xa estiveron activos durante as escavacións que se levaron a cabo durante os últimos meses. Así, tal e como relata José María Bello, as faenas realizáronse ao longo de seis meses, ata en días de fortes temporais. Dende xaneiro, ata finais do pasado mes de xuño, un grupo de arqueólogos estivo a traballar en Elviña sacando á luz superficies que aínda estaban ocultas.

Achados >Entre os descubrimentos realizados nos últimos meses, os especialistas encontraron restos dalgunha vasilla, pezas dun prato, así como anacos de tella, os cales confirman, unha vez máis, a presenza posterior dos romanos na zona.

A día de hoxe aínda se descoñece cando se levarán a cabo as próximas escavacións, algo que deberá tramitar a Xunta xunto coa Concellaría de Cultura. Iso si, as zonas nas que se levaron a cabo os últimos traballos xa están listas para que os arqueólogos continúen as faenas. Así, varios metros de lona cobren as franxas descubertas durante os pasados meses para que as condicións meteorolóxicas e os visitantes non dificulten a continuación das operacións que se deixaron iniciadas en xuño.

De momento, tampouco se pode dar unha data que concrete a finalización das escavacións, xa que, tal e como apunta o arqueólogo José María Bello, aínda poden quedar ao redor de tres hectáreas por escarvar. Poderíase dar o caso de que se encontrase unha muralla. Nese caso poderíase decidir se facela visible na súa totalidade ou, non dependendo do interese que puidese achegar.

4/9/09

Festas de Elviña

Hoxe empezan as festas de Elviña coa sesión vermú ás 14.00 horas. A verbena de hoxe e mañá correrá a cargo da orquestra Rumba Oeste que xa participaran nunha das xornadas do ano pasado, con gran éxito entre os veciños.

Maña haberá unha degustación de mexillón a partir das oito da tarde no campo da festa, que se encontra diante da Sociedade de Elviña.

O domingo celebrarase a tradicional misa á 13.00, coa procesión do Santísimo.

Boas festas a todos!

2/9/09

Festa afrogalaica



O sábado 26 de setembro tera lugar unha festa intercultural de África e Galiza. A xornada vén con actividades deportivas e gastronómicas que culminará cunha festa á noitiña.

PROGRAMA
- Torneo Internacional de Fútbol 4 -mañá e tarde- enfrontaranse equipos africanos e galegos.
- Competición de Futbolín -mañá e tarde-.
- Partidos de Baloncesto -mañá e tarde-.
- Degustación de comida africana e galega, para xantar, a prezos anticrise.
- Xogos populares -tarde-.
- Entrega de premios, ó final da xornada.
- Festa Hortera para a noitiña, amenizada por músicos espontáneos de tódalas nacionalidades; gaitas, djembés, pandeiretas...


Organizan a SRCD Tempo Novo e o colectivo Mondelivre

http://tempo-novo.blogspot.com/

20/8/09

A Xunta culpa o Concello do atraso nas obras da Residencia Universitaria.


A Opinión de A Coruña
19/08/09
A Coruña


Infraestruturas asegura que o Concello debe concluír o proceso de expropiación dos terreos.


O anterior executivo autonómico acordara cos afectados que os traballos non se iniciarían até que fosen realaxados.


José Manuel Gutiérrez. A Coruña. A Consellería de Territorio e Infraestruturas atribúe ao Concello coruñés o atraso producido na adxudicación das obras da residencia de estudantes da Universidade, que ten licencia de construcción desde finais do mes de marzo. O departamento autonómico asegura que o Concello aínda non concluíu o proceso de expropiación dos terreos necesarios para construír o complexo en Elviña, posto que aínda non hai unha proposta de realoxo para as familias cuxas casas deben ser derrubadas para permitir a posta en marcha do proxecto.


O vicerreitor de Infraestruturas, Xosé Lois Martínez, expresou a semana pasada na OPINIÓN o seu temor a que a demora de adxudicación do concurso cause a caducidade da licencia concedida á Universidade, cun prazo máximo para o inicio dos traballos de seis meses. En tan só uns días cumpriranse cinco meses desde a aprobación da licencia, sen que o Reitorado teña noticias acerca de cando se fallará.


Os afectados polo proxecto acadaran un acordo coa Xunta o pasado mes de febreiro para que os traballos non comezasen até que o expropiados dispuxesen dunha nova residencia, pero o cambio de goberno ao que deron lugar as eleccións impediu que se materializara.

O novo Executivo autonómico entende que é o Concello o organismo que debe facer fronte ao realoxo dos prexudicados pola iniciativa, xa que, aínda que o novo edificio pertencerá á Universidade, a operación urbanística é de carácter municipal, xa que se tramitou mediante un plano parcial.


O Reitorado sabía que a Consellería analizou xa as ofertas presentadas polas vintetrés constructoras que acudiron á convocatoria, pero ignoraba que existisen os problemas cos que Infraestruturas xustifica agora o atraso na adxudicación do proxecto.


As expropiacións de terreos na zona de Elviña para a construcción da residencia universitaria figuraban no plano parcial do campus, aprobado pola Xunta en decembro de 2006. A iniciativa afectada sesenta e oito parcelas que sumaban 44.202 metros cadrados de superficie.



Sete dos propietarios de terreos presentaron un recurso xudicial contra este proceso ao consideraren que as cantidades coas que foran indemnizados eran insuficientes, porque non se lles recoñecía a titularidade de terreos incluídos nesta operación, na que se fixou un prezo de 105 euros por cada metro cadrado expropiado, polo que as compensacións alcanzan os 5,6 millóns de euros.


O descontento coas propostas económicas efectuadas pola Administración levou os veciños da zona a cortar o tráfico en Alfonso Molina, a concentrarse no lugar de Castro de Elviña durante a conmemoración do bicentenario da batalla que tivo lugar na zona en 1809 e a protestar ante o alcalde durante a súa vistita ao lugar co ministro de Cultura en febreiro.


Outro dos motivos que a Consellería de Infraestruturas menciona como causa do atraso da construcción da residencia universitaria é que aínda esta pendente a sinatura dun convenio co Reitorado no que se determine cal será a fórmula de xestión do centro residencial.


O departamento non explica que influencia pode ter este acordo sobre o proxecto de construcción do complexo, que ademais tardará un mínimo de trinta meses en construírse, de acordo coas ofertas presentadas polas empresas participantes no concurso, de forma que Xunta e Universidade aínda terían este prazo para establecer a forma na que se explotará o centro residencial.

A demora na dispoñibilidade desta infraestructura xera unha fonda preocupación na Universidade, cuxos responsábeis insisten en que A Coruña é única cidade española cun campus que non ofrece prazas de aloxamento público, unha circunstancia que consideran que limita a capacidade de atracción dos centros docentes, malia que na cidade se imparten titulacións que non están disponíbeis nas outras universidades galegas e que gozan dun grande prestixio académico.


O alto prezo da vivenda na cidade e a escaseza da oferta dos pisos en alugueiro complican aínda máis o problema para os estudantes que proveñen doutras localidades, xa que deben enfrontarse a unhas rendas moi elevadas. Este situación derivou na aparición nos últimos anos de até un cento de infravivendas na contorna do campus, construídas por propietarios de chalés dentro das súas fincas, nas que ofrecen aloxamento a universitarios a prezos inferiores aos do mercado inmobiliario.


A saída á luz desta actividade clandestina puxo en marcha unha inspección por parte do Concello e da Axencia Tributaria que culminou coa orde de derrubo dalgunhas destas construccións, aínda que de momento non se executou ningunha demolición.


A construcción do Complexo requirirá arredor de trinta meses
Das vintetrés propostas presentadas polas construtoras que participan no concurso convocado pola Xunta, tan só dúas superan nas súas ofertas o prazo de trinta meses para a construcción da residencia universitaria, aínda que só nun e tres meses respectivamente, fronte aos trinta e seis que permitían as bases da convocatoria.

Por iso prevese que o complexo tardará en torno a dous anos e medio en estar dispoñíbel desde que o Goberno autonómico adxudique os traballos, o que deixará a Universidade coruñesa polo menos outros tres cursos sen contar con esta infraestrutura.

O centro proxectado polo Reitorado terá capacidade para seiscentas persoas distribuídas en catrocentos apartamentos para estudantes e profesores visitantes, con superficies entre os corenta e os corenta e cinco metros cadrados. Entre as construtoras que optan a executar o proxecto figuran algunhas das principais do país, como Ferrovial, FCC, Dragados, Isolux-Corsán-Corviam, OHL, Sacyr e Abeconsa así como varias das máis destacadas de Galiza, como Fontenla, Arias Hermanos ou Ángel Jove. En canto ás súas ofertas económicas, oscilan desde os 19,9 até os 24,1 millóns de euros.

O reitorado ten previsto pór en marcha un novo proxecto con catrocentas prazas máis en canto consiga desenrolar este último, que está a ter unha tramitación moito máis longa do agardado. Esta iniciativa tivo que soportar unha paralización de varios meses por mor da necesidade de modificar o plano xeral de urbanismo da cidade, xa que o visto bo da Xunta chegou moito máis tarde do previsto inicialmente.

1/8/09

Historia dun despropósito

Galicia Hoxe
1/08/2009

Yes, I do

Maré. Santiago. A maioritaria participación dos centros privados -agrupados en asociacións que desde o primeiro apoiaron o propósito do PP para rebaixar a proteción legal do galego- favoreceu que o castelán se eirixise no idioma triunfante da Consulta Vázquez sobre o idioma no que os pais queren a educación dos seus fillos. O propio secretario xeral de Política Lingüística, Anxo Lorenzo, que compareceu só ante os periodistas sen ningún dos dous impulsores da consulta, o presidente Alberto Núñez Feijóo e o conselleiro de Eduación, Jesús Vázquez, recoñeceu que os centros privados foran os máis dados a contestar o cuestionario dunha consulta que unicamente acadou o 58 por cento de participación. Non obstante, rexeitou dar datos sobre a diferenza entre o ensino público e privado.

Boa proba de que os centros privados impuxeron o seu punto de vista na consulta -e lle deron a Feijóo unha coartada política - é que en Formación Profesional -maioritariamente pública- o galego impúxose ao castelán. Con todo, a máis votada foi a opción bilingüe nese ámbito, o mesmo que ocorre en infantil.

Tras un mes de reconto, e cun custo declarado de 160.000 euros, a tan polémica e cuestionada consulta Vázquez non presenta, polo demais, ningunha novidade. "O conxunto das respostas das familias fan evidente que a sociedade galega se reafirma bilingüe. Esa foi a interpretación de Lorenzo nunha roda de prensa por veces tensa porque, analizando os datos polo miúdo, o que se amosa é unha polarización perigosa: en primaria e secundaria as respostas a prol do monolingüismo -sexa galego ou castelán superan as do bilingüe.

As familias dos rapaces e rapazas de maior idade amosáronse menos interesadas na consulta. A porcentaxe de respostas superou o 70% en infantil e primaria, pero caeu por debaixo do 40% en secundaria, pasando pouco do 30% en Formación Profesional.

Hai que ter en conta ademais que a maioría dos alumnos e alumnas están matriculados na educación primaria -127.000- e secundaria -124.000-. O censo utilizado pola Consellaría de Educación sitúa en 64.661 o número de estudantes de infantil, e en 15.144 o de alumnos de F.P. Lorenzo apuntou outro dato importante, que non precisou con cifras: responderon á enquisa máis os pais dos centros privados que os dos concertados, e máis estes que os dos públicos, polo que a representatividade da "mostra" é cuestionable, -independentemente de todos os defectos metodolóxicos que varios colectivos xa denunciaron-. Tampouco se de- sagregaron os datos segundo o hábitat rural-urbano.

Unha das cuestións que non ofrecen dúbida é o acordo dos pais con que se "impartan materias en inglés": o 91,5% dos de educación infantil, o 75,2% dos de primaria, o 63% dos de secundaria e a mesma porcentaxe en FP. Lorenzo aclarou que a Xunta "fará un esforzo" para que o ensino "trilingüe" sexa realidade en oito anos.

O resto dos datos poden interpretarse de diversos xeitos: como un apoio ao ensino en castelán, como un decantamento polo ensino bilingüe ou polo monolingüismo, con preferencia polo castelán. En educación infantil, malia que o 58,8% dos pais afirmaron que o castelán é a lingua inicial do seu fillo, máis da metade, o 53,2%, inclináronse por un modelo bilingüe. Pero son moitos máis os que optaron pola resposta só "castelán" que os que escolleron só "galego".

En educación primaria e secundaria a cousa complícase. Ante a pregunta "En que lingua preferiría as materias troncais?", a resposta máis numerosa é "todas en castelán" -37,6% en primaria e 33,8% en secundaria-. A segunda resposta máis escollida é "unhas en galego e outras en castelán": en primaria 26,6% e en secundaria 23,6%. E en secundaria a resposta "todas en galego" -19,8%- é máis elixida que en primaria -12,5%.

Se se suman as respostas "todas en castelán" e "a maioría en castelán", o castelán acadaría máis da metade: 54% pero non chegaría nin ao 50% en secundaria: 48,5% . A suma de "todas en galego" e "a maioría en galego" acada porcentaxes moito menores: 18,3% para primaria, e 27,5% para secundaria. A opción polo bilingüismo, -se se suman as respostas "a maioría en galego", "unhas en galego e outras en castelán" e "a maioría en castelán"- queda por debaixo da metade: 49.40% en primaria, e 48.5% en secundaria-. "Todas en galego" e "todas en castelán" suma o 50,10% en primaria, e o 53,6 en secundaria.

Se o que se suma son as respostas de todos os niveis educativos, conclúese que 75.577 pais prefiren un ensino só ou maioritariamente en castelán, fronte aos 35.019 que o queren en galego. Hai que ter en conta que os mesmos pais puideron contestar máis dun cuestionario, e que non hai garantías de que fosen os fillos os que respondesen-. Un total de 93.900 pais optaron por algún tipo de ensino bilingüe.


Galicia Hoxe

http://www.galicia-hoxe.com/index_2.php?idMenu=86&idNoticia=454076



15/6/09

A Universidade propón cambios no Plan parcial

La Voz de Galicia
15/06/09
A Coruña
Ana Lorenzo. A nova proposta urbanística que deseñou o arquitecto catalán Joan Busquets para a cidade coruñesa tamén ten unha pequena achega da Universidade dá Coruña, que quixo axudar a mellorar o planeamento na zona de Elviña e A Zapateira. De feito, a institución académica coruñesa fixo dúas propostas que conseguiron o voto afirmativo do Concello, xa que teñen como finalidade beneficiar os veciños que habitan na contorna dos campus, así como á propia institución educativa.
Segundo explicou o vicerreitor de Infraestruturas, Xosé Lois Martínez, o actual ordenamento urbanístico que rexe nesta zona é de 1990, e no mesmo facíase constar que unha vintena de vivendas do núcleo do castro de Elviña estaban, desde esa data, afectadas por un proceso de expropiación que aínda non se levou a cabo. «A xente levaba 19 anos coa espada de Damocles da expropiación sobre as súas cabezas, e poderían estar esperando 20 anos máis. A nosa proposta foi que se debía de cambiar o sistema de desenrolo do plan parcial, para facer compatible a supervivencia destas vivendas (que pertencen ao núcleo do castro), co desenrolo da universidade».
Deste xeito, pódense evitar dous grandes custos: o económico e o social, xa que se aforra o diñeiro das expropiacións (máis de 30 millóns de euros), e permítese que os residentes nesta contorna poidan seguir vivindo nesta zona e edificando segundo a normativa urbanística que rexe no núcleo tradicional do castro de Elviña. «O Concello recolleu esta suxerencia no seu novo plan de urbanismo, que está en exposición pública neste momento, e no que se explica que nestes 27.250 metros cadrados de terreo se exclúen do campus universitario, co que se poderá evitar a expropiación e ou derruba de aproximadamente vinte vivendas», recordou Xosé Lois Martínez.
A outra proposta universitaria ten un maior ámbito de actuación, posto que a superficie afectada ascende a 175.045 metros cadrados, que se reservaron para a ampliación da universidade, e afectaban os terreos que están situados entre a avenida de Alfonso Molina, a estrada do castro de Elviña e o campo de golf. Aquí había preto de 120 parcelas, cuxos propietarios tamén estaban pendentes dunha orde de expropiación, que aínda non se efectuou, co cal non podían construír nin realizar ningunha actividade en devanditas leiras desde facía 19 anos.
Adeus á expropiación
Neste caso, a proposta realizada desde a UDC foi a de cambiar o sistema de expropiación polo de cooperación, de tal forma que os donos dos terreos ceden gratuitamente á institución académica 45.000 metros cadrados; e, no resto (130.000), poderán construír cunha edificabilidade de 1,5 metro cadrado por metro cadrado. «Vai haber 120 propietarios que van ter os seus terreos urbanizables, onde van poder executar vivendas que ata agora non podían», explicou Martínez, quen dixo que, a cambio de ter liberalizado estas parcelas, a universidade vai desprazar o aproveitamento urbanístico que nun principio tiña nestes terreos, ás parcelas que conforman o actual campus de Elviña. De feito, nesta zona pasarán de ter unha edificabilidade do 0,5 metro cadrado por metro cadrado a 1,5.

10/6/09

A UDC retira o cableado para a Residencia Universitaria


La Voz de Galicia
A Coruña
10/06/09


A UDC retira o cableado eléctrico de Elviña e pide á Xunta que acelere a construción da residencia


Ana Lorenzo> A Universidade da Coruña xa fixo todo o que estaba na súa man para iniciar a construción da nova área residencial de Elviña. De feito, onte un grupo de operarios procederon a retirar unha liña de alta tensión, de 450 metros de lonxitude, que estaba instalada na zona onde se levantará o futuro complexo, e que era o último obstáculo que había que superar antes de comezar as obras.


Con todo, desde a Xunta aínda non anunciaron que empresa encargarase de realizar os traballos, unha decisión que quedou pendente tras as últimas eleccións autonómicas de marzo e o consecuente cambio de goberno. Segundo recordou onte o vicerreitor de Infraestruturas da UDC, Xosé Lois Martínez, «a licenza de obra foi concedida polo Concello hai tres meses, moito antes xa se convocara o concurso e xa están feitos os informes técnicos de cada proposta. Simplemente, queda unha decisión por parte do Instituto Galego da Vivenda e Solo (IGVS) de asignar ou proxecto a unha empresa».


Así mesmo, explicou que a anterior Consellería de Vivenda xa consignara unha partida orzamentaria para esta actuación de 24,5 millóns de euros, e que a residencia ten un prazo de execución que podería oscilar entre os 24 e os 36 meses. «A UDC xa ten realizado todo ou que se lle ten encomendado, e cada día que pasa sen iniciarse a obra é un tempo precioso perdido», insistiu Martínez, quen volveu recordar que a institución académica coruñesa é a única de Europa que non conta cunha residencia universitaria pública.


Competir en Europa


«Un dous grandes retos da UDC, pero sobre todo da cidade e a súa comarca, é poder competir en Europa nunhas mínimas condicións de igualdade, e poder ofrecer aos estudantes europeos unha oferta de aloxamento universitario público, ao igual que fan o resto de universidades europeas», destacou o vicerreitor coruñés. Neste sentido, quixo fai especial fincapé en que na Coruña se imparten varias titulacións, como Arquitectura, Aparelladores ou Enxeñería de Camiños, que son únicas no sistema universitario galego e en todo o noroeste peninsular, «e aquí non se lle estar a ofrecer unha residencia pública ao alumnado que ven de fóra. Non resto de universidades, as comunidades e vos concellos saben dá importancia que isto ten para ou desenrolo social e económico, e a situación actual prexudica á cidade coruñesa».


Por todo iso, Xosé Lois Martínez considera que non se pode demorar por máis tempo o inicio da construción desta área residencial universitaria, que terá capacidade para unhas 600 persoas, entre alumnos e profesores.

9/6/09

Escorrentía de terra no Souto


El Ideal Gallego
A Coruña
9/06/09




A.P.> A Coruña. Malia o aviso desde a central de emerxencias 112, as fortes chuvias que caeron como consecuencia do temporal, acompañadas por ventos de até cen quilómetros por hora, non afectaron de forma importante o casco urbano, pero si causaron un corte na estrada do Souto, que permaneceu inutilizada durante todo o día, segundo afirmaron veciños do lugar.

Foi precisamente antes de que amencese cando o temporal provocou que se desprendese terra, rochas e mesmo xermolos de árbores dun terreo que os residentes da zona aseguran que pertence a Xestur, a empresa de titularidade pública que se encarga de realizar as expropiacións de particulares.


Afortunadamente, os veciños que residen na estrada podían saír polo outro extremo, porque ninguén deu a voz de alarma aos servizos de emerxencia. Nin a Policía Local nin os bombeiros sabían do suceso a última hora da tarde. "Nós non estamos equipados para retirar terra", comentaron dende o parque da Grela.O aviso pasouse á Policía Local. Polo demais, trátase dunha vía secundaria con pouco tráfico, de maneira que o corremento de terras non causo atoamentos.



Tranquilo >Foi o único incidente causado polo temporal, segundo confirmou o xefe de bombeiros e Protección Civil, Carlos García Touriñán: "En realidade, a alerta deuna o 112 porque se trata dun tempo nada habitual por estas datas, pero o día resultou bastante tranquilo".


Aínda que algunhas zonas, como varios parques públicos, foron acordoados por voluntarios de Protección Civil, moitas outras seguiron accesibles ao público durante todo o día. Por exemplo, a praia de Riazor, e a explanada de Las Esclavas, lugar moi batido polas ondas, non foron precintados, como é habitual nestes casos. "Como xa tiñamos aí os socorristas, a zona estaba vixiada -aclarou Touriñán- e por iso non tivemos que tomar precaucións adicionais.

6/6/09

Presentación da RDS en Elviña

Este mércores presentouse no salón de actos de Tempo Novo a RDS e a Cartografía Crítica da Coruña. Fíxose unha exposición pausada sobre por que nace a RDS e en que consiste. Explicouse a cartografía crítica e falouse a grandes trazos do PXOM.

O debate posterior entre veciños e membros da RDS xirou arredor da necesidade dunha participación directa dos cidadáns na política, á marxe de siglas políticas. Resultou ben interesante a cuestión de se algúns problemas veciñais veñen da politización ou ineficacia das asociacións de veciños ou se ben se deben a un “pasotismo” xeneralizado da cidadanía.

Abrir unha conciencia crítica entre os cidadáns, con foros nos que se reflexione e discuta, sempre é positivo.