Manifestación contra os despexos de vivenda en Elviña e Eirís

Os veciños de Elviña volverán saír á rúa para buscaren unha solución aos trece desaloxos por mor das obras do Ofimático. E desta volta non camiñarán sos, farano acompañados por compañeiros de Stop Desahucios.

O que demandan, o que todos os veciños demandamos, é unha saída digna para as trece familias que teñen orde de abandonar as súas casas. A día de hoxe cinco delas xa teñen mandado xudicial de despexo nas súas casas.

O único diálogo firme que puideron manter agora co goberno municipal da Coruña foi o xudicial. Fronte ás promesas de buscar solución, o Goberno Municipal da Coruña deu como único paso o envío ao xulgado dun requirimento para botar das súas casas as familias que se negan a marchar.

Edificios baixo sospeita

La Opinión de A Coruña

A Coruña

21/02/2012

A denuncia da Fiscalía pola construción de inmobles sen licenza no campus universitario abre unha nova páxina no escándalo urbanístico da Universidade

Unha simple presentación dun edificio fixo posible descubrir que a Universidade construía os seus inmobles sen licenza municipal no campus coruñés. A revelación orixinou un escándalo que acabou co cese do vicerreitor de Infraestruturas, Xosé Lois Martínez, unha das persoas ás que a Fiscalía solicita que o xulgado cite a declarar como imputado nun presunto delito urbanístico. O Ministerio público califica de irregular a situación dun módulo de investigación e dos despachos instalados en dous aparcamentos

JOSÉ MANUEL GUTIÉRREZ A CORUÑA

A remisión a un xulgado de instrución da denuncia presentada pola Fiscalía pola suposta construción ilegal de dous edificios no campus é o último capítulo no devenir dun proceso que comezou o pasado mes de outubro, cando LA OPINIÓN desvelou a existencia de inmobles sen licenza municipal nos terreos da Universidade, situación que derivou na destitución do vicerreitor Xosé Lois Martínez.

O descubrimento. A presentación aos medios de comunicación o pasado 5 de outubro do edificio que alberga o primeiro módulo de investigación científica permite coñecer que a obra se executou sen licenza municipal, xa que se levantou sobre os terreos ocupados anteriormente por un aparcamento. O vicerreitor de Infraestruturas, Xosé Lois Martínez, admitiu alí que el mesmo se encargou de promover a actuación e que non solicitou o permiso do Concello porque sería imposible antes da aprobación do novo plan xeral, que aínda está en tramitación.

Edificio de investigación do Campus de Elviña que a Fiscalía considera ilegal. Víctor Echave

Reacción municipal. O coñecemento dos feitos leva o Concello ao día seguinte a ordenar a apertura dun expediente para restablecer a legalidade. "O fin non xustifica os medios, non poden saltarse á torera a lexislación vixente", manifestou o alcalde, Carlos Negreira.

Xustificación. O vicerreitor de Infraestruturas explicou o 8 de outubro a súa actuación pola carencia de terreos no campus nos que construír os edificios que alivien a conxestión das escolas e facultades. Martínez anunciou que continuaría construíndo en solo non edificable mentres a Xunta non ceda novas parcelas e que a Universidade espera desde 2005 a que o plan xeral modifique o plan parcial do campus para converter aparcamentos en terreos edificables.

Destitución. O entón reitor, José María Barja, decreta o 10 de outubro o relevo de Martínez por defender a súa actuación ilegal e ordena a paralización de todos os proxectos de edificación no campus.

Novos casos. O 13 de outubro, LA OPINIÓN desvela que os despachos construídos nos aparcamentos da Escola de Arquitectura Técnica e da Facultade de Ciencias tampouco contan con licenza municipal, situación que admitiu Martínez, para quen non se tratou dunha ilegalidade porque nunca tratou de ocultar a carencia do permiso.

Investigación. Os feitos levan a Fiscalía o 18 de outubro a abrir unha investigación de oficio para determinar se son constitutivos de delito.

Explicacións. A Universidade celebra Consello de Goberno o 20 de outubro, onde o reitor é interpelado sobre este tema por varios membros, a quen explica que o Reitorado intenta restituír a legalidade, o que decepciona aos que solicitaron as aclaracións.

Xudicialización. O pasado mes de xaneiro, la Fiscalía remite a un xulgado de instrución o caso co fin de que o investigue. O Concello afirma que colabora co reitorado, xa dirixido por Xosé Luís Armesto, para legalizar os edificios sen licenza.

Denuncia. A Fiscalía presenta no xulgado unha denuncia polos feitos e ordena que se chame a declarar como imputados a Xosé Lois Martínez e os directores das obras: César Portela, Cesáreo Padrón e Pablo Reboredo.

Flores garante unha residencia universitaria "pública e barata"

El Ideal Gallego

10/02/2012

A Coruña

REDACCIÓN > A CORUÑA

Julio Flores asegurou onte que a Universidade contará cunha residencia pública de calidade e con prezos económicos, “menores aos que se cobran no resto de cidades con residencia”, en declaracións a Onda Cero.

O portavoz do goberno local respondía desta maneira a Mar Barcón, quen calificaba de “miopía política” a decisión tomada pola Xunta de botar atrás o proxecto para a construción dunha residencia universitaria pública, decisión da que acusa ao presidente da Xunta e, en segundo termo, tamén ao alcalde. Tras reunirse onte co novo reitor, Xosé Luís Armesto, Barcón esixiu o cese dos recortes en educación e pediu explicacións polas expropiacións levadas a cabo pola Xunta para unha infraestrutura universitaria “que –sinalou– xa non se fará e que pode conlevar indemnizacións aos veciños de Elviña afectados”.

Tamén o BNG insiste na necesidade de dotar o campus desta infraestrutura

“Non deixaremos de reclamar a residencia, máis aínda tendo presente que –a da Coruña– é a única unidade galega que non ten residencia pública, que non é o mesmo que unha privada, pois non ten os mesmo prezos, non ofrece os mesmos servizos e non representa a mesma oferta”, avanzou a concelleira.

Flores lamentou que Mar Barcón se queixe cando en boa parte o retraso se debe a “outra chapuza na xestión urbanística ocasionada pola súa xestión”. Recordou que a actual portavoz socialista “tivo a súa parte de culpa no retraso da residencia universitaria cando era concelleira de Urbanismo”.

“Chantaxe” > Tamén o BNG se uniu onte ás críticas contra a Xunta pola “chantaxe” que, a ollos dos nacionalistas, somete o PP ao ente universitario para que acepte a xestión privada da residencia. “Trátase dunha chantaxe para beneficiar o empresariado e para primar os negocios por riba da calidade no servizo público”, manifestou onte o portavoz do BNG no Concello, Xosé Manuel Carril.

Desde esta formación insisten na necesidade de que a Universidade conte cunha área residencial pública, por ser a única que carece deste servizo a nivel estatal.

Na liña que o PSOE, Carril sinala que o modelo de financiación privado “encarecerá a construción da residencia” e remítese ás iniciativas para buscar acordos que permitan unha xestión pública e unha financiación pública, que, entende, “permitiría garantir que o estudantado puidese facer uso da residencia con independencia da súa capacidade económica”.

A Xunta condiciona a residencia a que a Universidade acepte a xestión privada

La Opinión de A Coruña

09/02/2012

A Coruña

O Executivo galego supedita a execución do complexo residencial de Elviña a que a institución académica acepte que o xestione unha concesionaria, opción que o Reitorado sempre rexeitou

SARA VÁZQUEZ A CORUÑA

A Xunta supedita a construción da residencia do campus de Elviña a que a Universidade acepte a xestión privada. O Executivo autonómico admite como única posibilidade viable para a execución da infraestrutura o sistema concesional e espera o visto bo da entidade académica, que se opuxo desde o principio a que unha empresa privada se ocupase de xestionar as prazas de residencia a cambio de construíla.

O Executivo galego sostén que o futuro da instalación dependerá, sobre todo, da decisión da Universidade xa que se tratará dunha instalación universitaria. O Goberno autonómico asegura que neste momento non existen fondos para afrontar o proxecto só co diñeiro público. A Xunta, segundo fontes da Consellería de Territorio, asegura que, se a Universidade rexeita o modelo concesional para a xestión da residencia, suporá converter o proxecto en inviable.

Á marxe da resolución que adopte a entidade académica, o Goberno galego espera a autorización da Intervención Xeral da Administración do Estado e da Consellería de Facenda ao procedemento de contrato por concesión de obra pública. Só despois de recibir o visto bo poderá licitar a construción e explotación da residencia universitaria.

O grupo municipal do PSdeG denunciou onte o "silencio cómplice" do alcalde, Carlos Negreira, ao que reprocha que, tras garantir o seu compromiso coa residencia, "garde silencio cada vez que a Xunta dá un paso máis na súa marcha atrás". Os socialistas afirman que a Xunta "deixa a Universidade coruñesa sen residencia pública para estudantes", agora, "co aval do Consello Consultivo".

O órgano independente avala a rescisión do contrato de deseño e dirección da obra a Aq4 Arquitectura xa que, entende, se efectuou conforme a dereito. O Consello Consultivo sostén, iso si, que se debe indemnizar o estudo "polos danos e prexuízos sufridos" como consecuencia da resolución da Xunta, que abonou á empresa 669.000 euros polo premio, a elaboración do proxecto e a liquidación do contrato.

O Instituto Galego de Vivenda e Solo determinou que o custe do proxecto da adxudicataria, vinte millóns de euros, era "desorbitado" e decidiu que a xestión do complexo recaia nunha concesionaria.

Tras anunciar que renunciaba ao proxecto, a Xunta garantiu que, aínda que a xestión fose privada, os prezos da residencia serían públicos. O conselleiro de Medio Ambiente e Infraestruturas, Agustín Hernández, asegurou que o modelo concesional non suporía a privatización da instalación universitaria e garantiu que sería "pública, funcional e operativa". O titular do departamento galego de Infraestruturas anunciou, ademais, a intención do Goberno autonómico de que a empresa que construíse o complexo residencial fose tamén a que o xestionase.

Tanto o anterior reitor, José María Barja, como o seu sucesor, Xosé Luis Armesto, defenderon a xestión pública da residencia. O novo reitor, ademais, considerou que, na situación actual, correspondía mover ficha á Xunta, responsable da financiación da residencia.

O Consello Consultivo avala a rescisión do contrato da residencia de Elviña

La Opinión de A Coruña

08/02/2012

A Coruña

O órgano autónomo abre a porta, porén, a que o estudo de arquitectura que elaborou o proxecto reciba unha cantidade "polos danos e prexuízos sufridos" pola resolución da Xunta

En contra da opinión da comunidade universitaria, a Xunta segue coa idea de que unha soa empresa constrúa e despois xestione a residencia de Elviña. Para iso, rescindiu o contrato con Aq4 Arquitectura, firma que realizou un singular deseño para a nova infraestrutura, cun custe que, segundo xustificou Vivenda, era "desorbitado". Pagou 669.000 euros aos arquitectos, aos que tamén anulou o contrato para dirixir a obra. O Consello Consultivo avala a decisión da Xunta pero advirte de que hai que indemnizar

ANA RODRÍGUEZ A CORUÑA

O Consello Consultivo considera que a rescisión do contrato con Aq4 Arquitectura, encargada do deseño e a dirección de obra da residencia de Elviña, fíxose conforme ao dereito. Iso si, matiza que, ademais do dereito do contratista a percibir o prezo dos estudos, informes, proxectos, traballos e servizos, a lei impón á Xunta a obriga de abonar ao contratista "os danos e prexuízos efectivamente sufridos por este, desde que se debía iniciar a dirección de obra ata o momento en el que se acordou a resolución" do contrato.

A Xunta decidiu renunciar ao proxecto inicial de residencia e pagar 669.000 euros á empresa inicialmente adxudicataria. En contra dos desexos da comunidade universitaria, o Instituto Galego de Vivenda e Solo (IGVS) tomou esta determinación despois de decidir que a xestión do complexo residencial non sería pública e que sería unha mesma empresa a que se encargaría do novo deseño, da súa execución e, finalmente, da xestión da nova infraestrutura universitaria no campus de Elviña.

A Xunta alegou para iso que o contemporáneo e "singular" deseño encarecía a residencia universitaria ata superar os vinte millóns de euros, un gasto "desorbitado". O novo proxecto, xustifican, aforra once millóns de euros, fronte aos 669.000 que, en principio, se perden ao non executar o traballo polo que foron abonados.

Aq4 Arquitectura asinaba o proxecto e tamén habería de encargarse da dirección da obra que o convertería en realidade. A empresa de arquitectos interpuxo un recurso de reposición contra a resolución da Xunta de rescindir o contrato de dirección de obra da residencia. Os arquitectos presentaron ao Goberno galego unha serie de solucións para abaratar os custes e evitar desbotar o deseño orixinal, pero todas foron rexeitadas por Vivenda.

O Consello Consultivo pronúnciase sobre o caso, xa que é obrigatorio, en caso de resolución de contratos por parte da Administración pública, que se solicite un informe deste órgano autónomo. O Consultivo avala a anulación do contrato de dirección de obra ao tratarse dun "contrato complementario" ao de construción da residencia de Elviña e xa que a Administración renunciou a levantar o complexo.

O informe do Consello Consultivo advirte, poré, de que non só basta con reportar ao contratista "o prezo dos estudos, informes, proxectos, traballos ou servizos que efectivamente se realizasen con arranxo ao contrato e que fosen recibidos pola Administración". "Impónselle á Administración a obriga de abonar ao contratista os danos e prexuízos efectivamente sufridos por este, desde que se debese iniciar a dirección de obras ata o momento en que se acorde a resolución", matiza o Consello Consultivo, baseándose no artigo 102 do Texto Refundido da Lei de Contratos da Administración Pública.

"Non temos ningún interese en chegar á vía xudicial", declaraba en novembro ao coñecer a resolución do contrato un dos membros do estudio de arquitectura afectado, "sería unha pena ter que chegar aí". Desde a firma explicábase que o proxecto podía "repensarse" e que lle ofreceran diversas propostas nesta liña á Xunta, que aínda non dou ningún paso máis para a construción do complexo residencial. Se nada cambia, a Xunta licitará, nun mesmo concurso, o proxecto, a construción e a xestión do edificio no campus de Elviña.

A Xunta avala o plan de control e a sondaxe arqueolóxica do Parque Ofimático

El Ideal Gallego

05/02/2012

A Coruña

REDACCIÓN > A CORUÑA

A Xunta avala o plan de control e sondaxe arqueolóxica do Parque Ofimático da Coruña. Segundo fontes do Concello, a Dirección Xeral de Patrimonio Cultural informou favorablemente a mencionado plan para as obras do proxecto urbanístico ubicado no entorno do barrio de Elviña.
“Esta notificación supón un novo avance na urbanización desta zona da cidade”, suliñou o responsable municipal de Medio Ambiente, Territorio e Infraestruturas, Martín Fernández Prado.

A necesidade de efectuar estes traballos previos foi requerida polo citado departamento da Xunta en outubro de 2007, ante a posibilidade de que a zona puidese albergar algún tipo de elemento arqueolóxico, despois de que en xullo de 2011, tras unha prospección inicial, localizasen unha fonte na zona de Eirís.

A zona urbanizable conta xa cunha serie de antecedentes históricos e arqueolóxicos que xustifican as probas neste espazo no que se levou a cabo a batalla de Elviña.
Ademais, están documentadas referencias doutros bens arqueolóxicos como a igrexa parroquial de San Vicente de Elviña, o xacemento arqueolóxico do castro de Elviña ou o camiño histórico do Temple.

Degustación > O denominado Parque Ofimático, ubicado na marxe dereita da entrada á cidade pola avenida de Alfonso Molina, terá 2.048 vivendas, 1.216 de elas de protección oficial. Foi proxectado, hai vinte anos, como unha área específica dentro da urbe para ubicar nela centros de datos de empresas e edificios de oficinas.

A idea inicial non callou co paso dos anos, porque ata hai ben pouco non se puideron completar os 350.000 metros cadrados deste ámbito.

Os coruñeses “pagan” a xestión de Vázquez

La Opinión de A Coruña

15/01/2012

A Coruña

Edificios do Plan Someso. Foto: Juán Varela

Parte dos impostos dos coruñeses serán destinados a pagar 8,16 millóns de euros a algunhas persoas que foran expropiadas en 1989 en Someso para construír un campo de fútbol. O Goberno dirixido por Vázquez, tras apropiarse das fincas, cambiou o seu uso e permitiu levantar edificios e un centro comercial. Os afectados recorreron á Xustiza, que decretou que o Concello indemnice o antigos propietarios dos predios con 8,16 millóns. Os prexudicados recibirán este mes os dous primeiros millóns.

T. Suárez /A. Rodríguez/ A Coruña. O Goberno local abrirá unha investigación sobre as presuntas irregularidades cometidas polo Executivo dirixido por Francisco Vázquez en 1989 ao expropiar parcelas en Someso. O Tribunal Superior sentenciou en 2010 ao Concello a pagar 8,16 millóns de euros aos propietarios das fincas. Os terreos, que foran expropiados para construír un campo de fútbol, albergan na actualidade vivendas e un centro comercial . LA OPINIÓN realiza, a seguir, un resumo das cuestións máis relevantes do caso.

Para que expropia o Concello os soares en 1989?
O Goberno dirixido por Vázquez tomou os terreos para construír un campo de fútbol para o club Relámpago do barrio de Elviña.

Cando se cambiou o uso que habían ter os terreos?
O plan xeral aprobado en 1998, que aínda está en vigor, cambiou o uso dos soares de Someso para permitir que fosen edificados.

Cando se aprobou o plan para Someso?
O plan parcial de Someso aprobouse en 2001 e foi modificado en 2004 para incrementar o uso residencial dos terreos. O Concello, que estaba dirixido por Francisco Vázquez, vendeu o 10% de aproveitamento urbanístico que lle correspondía á Xunta de Compensación, presidida por Antonio Fontenla, que está á fronte da Confederación de Empresarios de Galicia. A venda produciuse cando estaba en trámite a modificación da lei que prohibiría a venda directa do patrimonio municipal sen concurso público.

Cal foi a actuación do Grupo Antonio Fontenla?
Fontenla é o gran promotor do desenrolo de Someso. Canovan, unha empresa do seu grupo, ofertou a venda de pisos nun edificio que aínda carece de licenza e de plan que o ampare en Someso. O proxecto do edificio conta, ademais, con máis pisos que garaxes en propiedade, o que foi causa recente de nulidade de licenza no próximo inmoble da Torre Urbis. Fontenla tramitou en 2010 unha modificación do plan parcial para que se lle permitise facer o inmoble de maior dimensión que a prevista inicialmente; e tamén solicitou outro cambio para agrupar tres edificios de vivenda protexida en dous e poder construír máis pisos.

Como reaccionaron os antigos propietarios dos soares?
No 2004 os expropiados demandaron ao Goberno municipal que lles devolvese os terreos, xa que os adquirira para construír un campo de fútbol, non para vivendas. A lei prohibe ás Administracións o cambio de uso das fincas expropiadas, polo que o Concello alegou no 2004 que as adquirira mediante un proceso de libre compravenda e negouse a executar a reversión aos seus antigos propietarios.

Cando se inicia o proceso xudicial?
Os expropiados recorren á Xustiza en 2008 para esixir ao Goberno local a devolución das súas fincas.

Que deciden os tribunais?
Tras anos de demandas, recursos e sentenzas, o Tribunal Superior de Xustiza de Galiza condenou en outubro de 2010 ao Concello ao aboar os 8,16 millóns de euros aos expropiados de Someso. O alto tribunal galego sentenciou ao Concello a aboar esa cantidade aos afectados en concepto de indemnización, xa que a devolución dos terreos é inviábel.

Como reacciona o Concello?
O Executivo presidido por Javier Losada alegou que carecía de diñeiro para pagar as indemnizacións e remarcou que o pago dos 8,16 millóns suporía “un grave trastorno para a facenda municipal”. O Concello propón dar terreos aos afectados noutras zonas da cidade, pero os maxistrados denegan esa posibilidade e ordenan que pague aos prexudicados.

O caso está pechado?
A sentenza do Superior responde aos recursos que presentaron algúns dos expropiados, pero outros, ao coñecer que os xuíces deran a razón aos seus antigos veciños, presentaron novos recursos contra o Concello en febreiro de 2011. A Xustiza tramita na actualidade 23 recursos contra a actuación do Executivo municipal en Somesmo.

A que acordo chegou o actual Goberno para acatar o fallo xudicial?
O actual Executivo acordou cos afectados que lles pagará a prazos os 8,16 millóns de indemnización. Os expropiados repartiranse dou millóns antes de que remate este mes, e recibirán unha cantidade similar antes do 31 de marzo. O terceiro prazo aboarase antes de que finalice o ano, mentres que o último se entregará antes do 31 de marzo de 2013. Os demandantes renunciaron aos 825.000 euros que lles corresponden polos intereses de demora xerados desde que se fixo pública a sentenza.


Javier Losada e Mar Barcón son os dous únicos nomes que saen da boca do Partido Popular á hora de pedir responsabilidades polas políticas urbanísticas en Someso. Piden a dimisión de ambos, esgrimen razóns pola súa participación nas diferentes decisións dos sucesivos Gobernos socialistas que desembocaron na millonaria indemnización, pero evitaron en todo momento citar a cabeza daquel Executivo, Francisco Vázquez.

Á primeira que sinala a nota de prensa enviada en nome do presidente do PP local, Fernando Fernández Barreiro, é a Mar Barcón para esixir a súa dimisión. Lembran que a edil socialista formou parte da Xunta de Goberno local de 2004, na que se aprobou a venda dos terreos expropiados en Someso en 1989 para construír un campo de fútbol que nunca se fixo. O ex-embaixador era alcalde naquel momento. “Pola súa parte”, prosigue a nota de prensa, “o ex-alcalde Javier Losada formaba parte do Goberno municipal que en 1989 enganou os propietarios das parcelas ubicadas en Someso”. Tampouco ningunha frase sobre o rexedor daquel Executivo municipal. Recordan que en 2004, cando Losada era concelleiro de Urbanismo, se negou a devolver as parcelas orixinais aos seus propietarios. E, de novo, nada de Vázquez, que deixou de ser alcalde en 2006. O Goberno municipal anunciou o venres que abrirá unha investigación para esclarecer responsabilidades. Para o BNG, a orixe das compensacións no é a expropiación dos terreos, senón a súa reclasificación, que foi aprobada polo PP mediante o respaldo ao PXOM de 1998 e a plan parcial de 2001.