29/5/09

Obradoiro de danza do ventre


Tempo Novo

22/05/09



O fin de semá 6 e 7 de Xuño realizarase na SRDC Tempo Novo un taller de Danza do Ventre, impartido pola mestra Eva Domínguez, auténtica profesional da danza e da fotografía.


O taller comezará o sábado 6 pola tarde, as 16:30, e ó longo de 3 horas ensinaranse os pasos e movementos básicos desta danza oriental. Despóis de descansar, ó chegar a noitiña, iremos tomar unha deliciosa cea lixeira á de Carmelo, en Castro de Elviña. A festa continuarase ó longo da noite, poñendo en práctica os movementos aprendidos.


O domingo 7 concluirase, as 16:30 da tarde cunha coreografía dos movementos aprendidos.
O coste deste taller, sería de 35 €, todo incluído, TALLER + CEA


Como mínimo, para poder facer o taller necesitamos contar cun mínimo de 13 persoas.


Para apuntarse, pódese mandar un e-mail o correo da sociedade: srdctemponovo@hotmail.com ou ben a rakicastro@hotmail.com, tamén poñéndose en contacto con calquera dos membros da directiva ou chamando ó teléfono 653 253 976


ANIMÁDEVOS E NON DUBIDEDES EN APUNTARVOS¡¡¡¡¡¡¡


http://tempo-novo.blogspot.com/

Presentacións nas AVV da RDS e da Cartografía crítica

RDS
29/05/09


Esta semana leváronse a cabo as dúas primeiras presentacións da Rede e da Cartografía Crítica en Asociacións Veciñais, o martes 26 na de Monte Alto e o 28 na do Agra.
Presentación na A.VV. da Agra do Orzán

A acollida foi moi boa nos dous sitios, é destacable como na do Agra, que non participou durante este tempo da rede mostraron interese, cando menos, en seguir traballando sobre propostas que se lles fixeron durante a presentación.


Seguimos coas presentacións en diferentes espazos, o vindeiro día 3 de xuño nos Rexumeiros de Elviña.

26/5/09

Os expropiados de Elviña piden que se cumpra o realoxo pactado


La Voz de Galicia

A Coruña

26/05/09


Acusan ao Concello de incumprir os seus propios acordo e de non atendelos



Sobre doce vivendas de Elviña-Castro pende a ameaza dunha expropiación forzosa pola construción da residencia universitaria e do Centro Tecnolóxico, prevista dentro da ampliación do campus. Máis aló da oposición a este tipo de medidas, os afectados aseguran sentirse abandonados polo Concello e decepcionados pola anterior Xunta, que finalizou o seu mandato sen chegar a asinar un acordo xa negociado, que recollía, en parte, as súas demandas, por unha banda o realoxo na mesma contorna, e por outro, o pago dunha cantidade próxima á que terán que abonar polas súas novas vivendas.


O presidente da asociación veciñal, Carlos Maceiras, explica que a normativa os debería protexer, pero con todo, o Concello desentendeuse de esixir que se cumpran os documentos que asinou no seu día, o que o levou a «este conflito». Explica que o plan parcial de 1991 para a zona contemplaba que no caso de que o crecemento do campus afectase a áreas residenciais se debería levar a cabo un realoxo nas inmediacións, pero «o Concello aprobou a reforma do plan parcial saltándose o que o plan de urbanismo dicía que había que facer».


Recorda que ante este «incumprimento» os afectados e os veciños da zona, que os apoian, optaron por levar a cabo medidas de presión, de cortes de tráfico parciais, o que levou á Xunta a sentarse a negociar.


Os afectados esixiron un acordo marco de realoxo ás consellerías de Vivenda e Innovación, que expropiaban os terreos. O presidente veciñal indica que as negociacións comezaron en novembro do 2007. Como interlocutor tiñan á Consellería de Vivenda, ao delegar Industria e o Concello nesta administración todo o proceso.


«Respecto institucional»


Tras varias propostas non aceptadas, en xaneiro pasado, chegouse a un documento aceptado polas partes. Nel recollíase que aos desaloxados permitiríaselles optar a vivendas unifamiliares, situadas na zona destinada ás casas dos profesores. A postura do colectivo foi o que non se producisen negociacións individuais e apostar por condicións similares.


O problema xurdiu cando viron que desde Vivenda se lles ofrecían 520 euros polo metro cadrado, e Industria aos seus afectados ofrecíalles 812, pero deberían afrontar o pago de 1.200 euros o metro cadrado da nova casa.


Nas negociacións logrouse que Vivenda alcanzase os 812.Aínda que acordaran, segundo din, selar o acordo antes dos comicios autonómicos, isto non se produciu. «Marcháronse sen dicir adeus e non deron ningún tipo de explicación», indica Maceiras, que apuntou que houbo un mutismo total e non contestaban nin ás súas chamadas.


Os veciños aseguran que ademais da Xunta, non conseguiron reunirse con ninguén do Concello, a pesar de ter solicitadas entrevistas co alcalde, a concelleira de Urbanismo e o edil de Promoción Económica. «O que pedimos é un respecto institucional», comenta a representación dos afectados.


Explican que a única institución que respondeu é a Universidade, que discutiu o documento en comisión de goberno e informoulles de que o aprobaría cando fose preciso. Esta semana, os afectados reuníronse co delegado provincial da Xunta, Diego Calvo, nun encontro que cualifican de satisfactorio e no que, apuntan, comprometeuse a que non se iniciarían as obras sen ter asinado o realoxo.Fronte ás críticas ao goberno municipal, a edil de Urbanismo, Obdulia Taboadela, indicou en días pasados que era unha cuestión que deberían negociar coa Universidade e a Xunta.

Un novo fogar do tamaño do seu actual garaxe


El Ideal Gallego
A Coruña
24/05/09


Reportaxe de C.R.

Parece que os veciños de Castro de Elviña poderían chegar por fin a un acordo económico que os afectados consideren máis xusto, pero iso non fai desaparecer o problema, cando menos para unha das partes. Son doce familias que deberán abandonar o seu fogar para comezar a vivir –cando se constrúan- nunha vivenda de protección oficial cunhas condicións totalmente diferentes ás que tiñan, que en moitos casos son peores.

Un caso concreto é o de Beatriz Abad que terá que cambiar a súa casa de 340 m2 cun terreo de 2000 por unha casa unifamiliar de 90m2 sen finca. Esta afectada explica que perderá a calidade de vida da que dispón e non só ela se verá afectada, o seu fillo de quince anos deberá esquecerse de invitar os seus amigos á pequena cancha de baloncesto da que dispón e o seu home de todos os artigos de caza e animais disecados que garda no soto de 40 m2.

Incluso os seus amigos cambiarán de vida. É que esta familia adoitaba celebrar festas e ceas no seu garaxe de cen metros ou na mesa de pedra que teñen na súa finca. “E todo iso acabouse”, declara entristecida Abad. Entre as súas maiores preocupacións tamén están os animais xa que, ademais dos cans, tamén ten faisáns. “E agora que fago con todo iso?”, pregúntase esta muller que aínda que tivo dous anos para asimilar o problema, admite que non imaxina cando teña que irse realmente.

Tamén o terán que facer os seus sogros de oitenta anos e deixar os seus cochos e galiñas para viviren sos nunha nova vivenda. Abad denuncia tamén o seu caso, xa que actualmente a parella posúe dous pisos independentes e contiguos á súa casa, un dos que ten alugado, pero ambos están nun mesmo inmoble e só lles aboarán o prezo dunha casa.

Beatriz Abad entende que a Universidade e cidade teñen que crecer pero reclama que, se para iso teñen que abandonar o seu fogar, se lles ofrezan unhas condicións similares ás que tiñan.

Os expropiados de Elviña confían en que a Xunta ratifique o acordo xa pactado

El Ideal Gallego
A Coruña
24/05/09
O superdelegado da Xunta na Coruña reuniuse esta semana cos veciños expropiados de Elviña e diminuíu as súas preocupacións. Tras o encontro os damnificados teñen a esperanza de que o goberno galego ratifique o novo acordo ao que chegou con anteriores dirixentes.
C.R. A Coruña

Con esperanza. Así é como saíron os veciños de Castro de Elviña que serán expropiados para construír a residencia universitaria tras a reunión que mantiveron coa administración autonómica. O superdelegado do goberno galego na provincia, Diego Calvo, reuniuse esta semana cos afectados e parece que se comprometeu a intentar ratificar o convenio que, de palabra, xa tiñan acordado coa anterior Xunta.
O portavoz dos damnificados, Carlos Maceiras, cualifica de “positiva” e, segundo os presentes, nada tivo que ver cos anteriores encontros, “moi tensos”. “Non houbo ningunha negativa de entrada”, afirma Maceiras, o que xa considera como un paso cara a adiante. Tras unha explicación por parte dos veciños de todo o proceso polo que pasaron durante estes dous anos, Calvo comprometeuse a defender o acordo inicial que existía porque considera razoábeis as esixencias dos afectados. Os veciños destacan o informado que estaba o delegado sobre o conflicto e el asegurou que se poñería en contacto con eles nun prazo de vinte días.
Maceiras asegura que Calvo tamén se comprometeu a non desaloxar ningunha familia nin dar comezo ás obras ata que o acordo e o proceso administrativo estivese pechado, algo que tranquiliza aos que serán expropiados.
O pacto ao que chegaran coa anterior Xunta consistía basicamente en aumentar o prezo que lles abonaría a administración por metro cadrado ata superar os oitocentos euros no caso do terreo edificado, nun principio esta cifra situábase en cincocentos vinte. No caso das fincas o prezo é de cento cinco euros.
Os veciños sempre denunciaron a diferencia que existía entre o que lles pagaba o Concello e o que debían pagar os expropiados pola súa nova vivenda de protección oficial, entre novecentos e mil douscentos euros o metro, segundo a situación de cada familia. O obxectivo era achegar os prezos para evitar o desfase económico entre ambos inmobles.
Proxecto> A nova Xunta será a encargada de adxudicar a construcción da residencia a unha das vintetrés empresas que accederon ao concurso público que finalizou o prazo de presentación en febreiro.
O proxecto, elaborado por un estudio catalán, inclúe catrocentos apartamentos de entre 40 e 45 m2, con capacidade para seiscentos estudiantes e profesores, dúas grandes prazas a cada un dos lados xa que se lle deu gran importancia aos espacios comúns. Prevese que o edificio estea listo no 2012.

24/5/09

Um passeio polo lugar d'Elvinha

Rede de Direitos Sociais
28/03/09

Rodeadas de umha autêntica apocalipse post-urbana. Assim vivem no âmbito quotidiano as vizinhas e vezinhos do histórico e singular lugar-bairrode Elvinha, no -atual- perímetro urbano da Corunha.
Partes significadas dum cinto sub-rural paradoxalmente rodeado e acossado polo próprio tecido urbano da metrópole corunhesa, os lugares que conformam esta comunidade humana assentada neste território desde há séculos sofrem hoje a pior das violências especulativas: a institucional.
As expropriaçons inerentes ao crescimento desmedido dumha instituiçom-negócio (a Universidade da Corunha) ninguneam umha realidade social de respeito e aproveitamento sustentável dos recursos consolidadadurante geraçons nas terras de Elvinha, hoje pendentes de expropriaçons irrisórias a mãos da UDC. E a ninguneám em fondo e forma. Tratando de borrar do mapa umha organizaçom do território centenária e fazendo-o sem realoxos dignos. Oferecendo esmolas dificilmente equiparáveis a qualquer preço lógico queempurram as vizinhas futurivelmente expropriadas cara a umha incertasituaçom no económico e vital.
Desde o eixo de território da Rede de Direitos Sociais (Rede de ativistase vizinhas da Corunha) caminhamos junto as nossas compas de Elvinha, por este tecido societário baixo risco de destruiçom iminente (o desalojo das primeiras vizinhas pode vir no prazo dum par de meses) conhecendo, comprendendo e analisando este espaço físico e afetivo em conflito aberto com a instituiçom/universidade.
Estade atentas a novas infos.

23/5/09

Novo proxecto no Campus de Elviña


La Voz de Galicia
22/05/09
A Coruña



A UDC proxecta un centro de investigación da madeira sobre un aparcadoiro




Dolores Vázquez. Os 37.000 metros cadrados destinados á investigación no campus coruñés veranse ampliados cun novo centro, a denominada unidade mixta de investigación da madeira, que se vai adxudicar en 15 días e que se espera que entre en funcionamento o próximo ano, segundo avanzou o vicerreitor de Infraestruturas, Xosé Lois Martínez, que defendeu que este tipo de inmobles se incorporen ao campus.

O inmoble, financiado pola Consellería de Innovación con 300.000 euros e que terá 300.000 metros cadrados, é un deseño dos arquitectos Covadonga Carrasco e Jorge Salgado. Situarase encima dun inmoble destinado a aparcadoiro entre a Escola Superior e a Técnica de Arquitectura.

O edificio, construído en madeira, sobrevoa catro metros sobre a rúa e o seu deseño, moi lonxitudinal, emula a pezas esculpidas. «Fachada, cuberta, chans e mobiliario serán de madeira. O edificio como unha peza en si mesma», explicou Carrasco, que indicou que se sitúa entre dúas placas de formigón e terá un prazo de execución de nove meses.

Martínez destacou que se apostou por este material non só por ser o motivo principal do centro, senón que recordou que hai unha «razón cultural porque a cidade da Coruña é a cidade de madeira», apostilou en alusión ás galerías. Así mesmo, destacou que o uso da madeira na construción tendeuse a relegar desde a aparición do formigón, pero indicou que noutros países europeos xa se está producindo esta tendencia e no caso galego supón tamén unha aposta pola sustentabilidade, non só porque non é un recurso esgotado, senón pola súa capacidade como material reciclable.

Martínez tamén manifestou que a localización permite relacionar as dúas escolas e estimou, respecto ao aparcadoiro, que «a crise tamén vai supoñer un cambio» dos espazos na cidade e levará a dar outros usos a algunhas zonas.

19/5/09

Xeografía sonora do val de Elviña

La voz de Galicia
A Coruña
19/05/09
A Universidade publica o traballo de Ana Filgueiras cos nomes dunha zona que no seu día «foi a que nutriu a cidade, un libro de pedra que está desaparecendo»
Rodri García. «A xente de Elviña canta / e canta por non chorar / ou pobo que tanto queren / xa lle o queren quitar». é a primeira estrofa da canción coa que un grupo de veciños pecharon onte a presentación de O val de Elviña, a identidade cultural na memoria , unha publicación coa que a Universidade coruñesa celebrou o Día das Letras Galegas. Ana Filgueiras, a autora deste traballo, falaba na mañá de onte entre os xardíns da Casa do Lagar, coa emoción asomada á súa garganta e a choiva ameazando desde o alto dos Curutos e Os Castros e a piques de baixar pola Cavaxe. Todas esas son, pódese ler na publicación, «designacións cunha forte personalidade e con voz propia que hoxe en día non somos quen de ouvir». Tamén cualifican esta toponimia como «un legado de primeira orde cunha forte base territorial que vai desaparecendo de vagar ao sobrepoñérense neste espazo novas denominacións asépticas alleas».

Filgueiras confesou que é cascarilleira, «das Atochas», desculpouse porque «non sei cociñar ben as palabras» e recordou como «o Val de Elviña foi o que nutriu a cidade, que logo cuspiu sobre ela o cemento de moitas maneiras». Tamén evocou o monte das Arcas, cuxo topónimo aínda se conserva nunha leira da Zapateira, no que había «a necrópole máis antiga, con trinta e tres túmulos funerarios», ademais de menhires.

Unha arca de cartón é precisamente a que contén os vellos topónimos recuperados; Ana Filgueiras apuntou que aí dentro «están as vidas das persoas, que é o fundamental», cualificou estes testemuños como «libros de pedra que están desaparecendo» e considerou «grave e dramática» a desaparición da terra. Para a autora deste traballo de investigación antropolóxica, a publicación auspiciada pola Universidade «é un punto de esperanza no desalento».

Carlos Maceiras, en nome dos veciños de Elviña, agradeceu a recuperación desta toponimia e a súa publicación, á vez que reivindicaba que a ampliación do campus universitario «se faga de maneira racionalizada, porque os veciños queremos seguir vivindo en Elviña, somos os gardiáns deste ben cultural» e comprometeuse «a que seremos bos veciños».
Manuel Rivas evocou recordos da súa infancia neste lugar, algúns vinculados á tasca de Leonor e outros ás mulleres que xogaban ao fútbol, «despois veu Messi, pero non vin a ninguén xogar como Maruxa Tasende».

Xurxo Souto recordou topónimos perdidos na cidade e aludiu á «Mariña Dourada, ese campo de aí», dixo sinalando cara ao comedor universitario.

O reitor, José María Barja, reiterou o compromiso «de que os veciños sigan aquí» e indicou que a recuperación desta toponimia era un compromiso. Tamén recordou as palabras de Ramón Piñeiro sobre a necesidade de «galeguizar Galicia», algo do que «queda moito por diante», e tamén na defensa do idioma «a máis grande riqueza de Galicia».

A "canción protesta" en Elviña


El Ideal Gallego
A Coruña
19/05/09



A “Canción protesta” de Elviña pide a Barja un compromiso firme cos veciños


Reportaxe de Marino Pérez


O acto no que estaba prevista a presentación do libro “O val de Elviña, a identidade cultural na memoria”, converteuse nunha reivindicación por parte dos veciños da área na que se sitúa a Universidade, debido a que a súa expansión supoñería o derrubo das súas vivendas.


“Aquí todos queren encher a mochila, aínda que para eso, alguén perda a vida”. Esa foi a conclusión, o final da tonadilla coa que quixeron rematar os nativos de Elviña unha composición especificamente creada para o día de onte. É que, di Carlos Maceiras, presidente da asociación de veciños Os Rexumeiros de Elviña e Castro, que son moitos os anos que levan vivindo nas súas casas “para que agora veñan botarnos delas”.


Por iso é entendíbel que o que había ser a presentación dun libro sobre Elviña, sobre a súa idiosincrasia, as súas tradicións e os seus mitos e lendas, se convertese nun espazo para a reivindicación polas consecuencias da residencia universitaria. Tanto Maceiras coma os seus veciños, aos que se lles uniu o escrito Manuel Rivas á hora de entoar, debido ao seu pasado como residente no barrio, pediron “un compromiso máis firme” á Universidade. Até agora, para eles, a súa postura fora “un tanto ambigua”.


O reitor, José María Barja, asegurou que o compromiso da entidade que dirixe coa zona contigua “seguirá a existir”. Pero é que o órgano educativo pouco ten que ver cos dictados de quen decide construír aquí ou acolá e “cargarse vinte ou corenta casas”, tal e como sinalou Maceiras. O que foi fundador da agrupación veciñal no seu día, e que onte exerceu como compoñente dun coro improvisado, acusou os constructores de “falla de imaxinación no traballo”: “Teñen un millón de metros para construír, non había necesidade de tirar nin unha vivenda”. Na súa intervención, o responsábel veciñal afirmou que son “partidarios da expansión, pero con racionalidade”. Lembrou, ademais, a figura de Antonio de Manuco, que se matou “botándose ao tren cando o quixeron deixar sen a súa casa, onde vivira sempre”.


O caso da “canción protesta” non terminaba aí, senón que arengaba á loita aos máis novos, declarándose os máis vellos cansos, e pedindo un esforzo ás xeracións vindeiras. “Non imos quedar parados, non imos sentar a mirar como nos botan das nosas casas”, avisaban os veciños, “se nos queren botar imos resistir”. Por outra banda, tranquilizaban aos presentes dicindo que o seu discurso “non é unha ameaza, aínda que podería provocar un conflito social grave”.


Rivas secundou a postura de Carlos Maceiras e, tras asegurar que “o que é de Elviña leva a pertenza ao val como unha tatuaxe, para sempre”, solicitou un cambio de nome: “Deberíase chamar Universidade de Elviña”. Visibelmente emocionado, mirou atrás para recordar a Maruxa Tasende, unha das mulleres que xogaban ao fútbol na zona do castro: “Primeiro estaba ela, despois apareceu Messi”. O autor de “O lapis do carpinteiro” relatou como viu por primeira vez a televisión “na tenda de Leonor” e ao home do tempo, que apuntaba sempre ao mesmo lugar do mapa cando chegaba unha borrasca desde as Azores: “Despois souben que Mariano Medina –nome do meteorólogo- apuntaba a Elviña, aos nosos tellados”.


A terra das mulleres futbolistas, das pedras que falan para contaren a historia que as precedeu e do que Rivas chamou “o realismo máxico da fábrica da Coca-Cola” corre, segundo os seus habitantes, “risco de desaparecer”. Por iso, para homenaxeala, Filgueiras recolle na súa obra o que foi o castro, empregando os seus coñecementos de arqueoloxía para contar “as vidas das persoas”.




17/5/09

Toponimia de Elviña


Manifestación na defensa do galego


A Mesa

17/05/09
17 DE MAIO.- Máis de 50.000 persoas uníronse en Santiago de Compostela á maior manifestación da historia en defensa do galego .
O acto final tivo que repetirse dúas veces nunha praza da Quintana repleta, mais houbo miles de persoas que non deron accedido
Carlos Callón pídelle a Feijóo e aos seus conselleiros “que se apropien do galego”

Vista da Quintana (Vieiros)

Desde as doce do mediodía até pasadas as tres da tarde 50.000 persoas manifestáronse esta mañá nas rúas de Santiago de Compostela na que foi a maior manifestación en defensa do galego da Historia, na que a mensaxe foi unánime: “nin un paso atrás para o noso idioma”. Cando a cabeceira da manifestación chegaba á Praza da Quintana aínda había xente saíndo da Alameda, e a pesar de que se realizou o acto de clausura dúas veces, houbo miles de persoas que non conseguiron acceder á praza.

Unha vez feita a chegada á Quintana da cabeceira da manifestación e despois de que Mercedes Peón dese coa súa intensa voz a benvinda aos manifestantes, desde o palco, o presidente da Mesa, Carlos Callón, dirixiuse a Alberto Núñez Feijóo para pedirlle que se apropie do galego: “Feijóo, o mesmo que levantou no seu día a bandeira do odio contra a nosa lingua, dixo onte que había quen quería apropiarse do galego. Nós pedímoslle que el tamén se apropie do galego, que o faga seu, e tamén llo pedimos aos seus conselleiros, como Pilar Farjas ou Javier Guerra, analfabetos en galego”.

Callón chamou á “mobilización continuada da sociedade” e lanzou unha advertencia ao goberno da Xunta: “Que non nos pidan ningún consenso para enterrar o galego nin para que renunciemos aos nosos dereitos. Se os actuais gobernantes queren desmantelar a oficialidade do noso idioma, volveremos a saír á rúa, as veces que faga falta.”

Un dos momentos máis emotivos do día foi cando se deu lectura por vez primeira ao Manifesto a prol da convivencia lingüística e a igualdade de dereitos para o galego. Yolanda Castaño, Nemésio Barxa, Teresa Moure e Avelino Pousa Antelo foron a voz das máis de 20.000 persoas e 600 colectivos que apoiaron até o de agora este texto, promovido por 30 persoas de distintos eidos da sociedade galega.

A presenza no palco de Pousa Antelo, un histórico galeguista que aos seus 95 anos continúa sendo un dos máis activos defensores da lingua galega, despertou unha inmensa ovación de todos os asistentes. As palabras de ánimo do Presidente de Honra da Mesa serviron de exemplo vital para os miles de nenas e nenos presentes na manifestación, algún dos cales encabezou a marcha con pancartas como “Señor Feijóo, queremos xogar e aprender en galego” ou “Mil primaveras máis para a nosa lingua”.

Precisamente o ensino en galego protagonizou moitas das consignas coreadas polos asistentes á manifestación, entre elas “Os conselleiros ás galescolas” ou “Na Galiza, ensino en galego”. Tamén houbo berros para a chuvia, que non conseguiu diluír as ganas dos milleiros de galegos e galegas que hoxe se manifestaron para defender a nosa lingua propia: “Aínda que se molle a nosa lingua non encolle”.

Foron moitas e moi diversas as asociacións e colectivos que acudiron con pancartas propias á manifestación, na que se escoitou falar moito galego mais tamén castelán, deixando patente que non só os galegofalantes queren a igualdade de dereitos para o galego, senón que a maioría da poboación galega está en contra da desmantelación da protección xurídica do galego que pretende o goberno do Partido Popular.

http://www.amesanl.org/noticias/noticia_tipo.asp?IDNOTICIA=1433

http://www.vieiros.com/nova/74130/manifestacion-historica-en-defensa-da-lingua

14/5/09

Entrevista con Carlos Negreira


Hoxe á mañá a directiva da Asociación dos Rexumeiros reuniuse co concelleiro do PP da Coruña, Carlos Negreira para tratar os asuntos referidos ás expropiacións en Elviña.

Durante a entrevista abordouse principalmente o conflito social que está xerando a expansión do Campus de Elviña, no que se están a incumprir os compromisos de realoxo no entorno que estaban comprometidos, tanto pola Xunta como polo Concello da Coruña.

O principal motivo desta reunión foi precisamente o total abandono institucional ao que Concello somete os expropiados. O Concello non asinou os acordos de realoxo e non respondeu ás solicitudes de entrevista co alcalde o coa concelleira de urbanismo para abordar esta cuestión.

Desde a asociación veciñal enténdese que non se trata dunha cuestión de siglas políticas senón de Administracións. Neste sentido o presidente dos Rexumeiros, Carlos Maceiras, deixou claro que se acode ao grupo popular despois de que o goberno municipal non quixese falar do asunto do realoxo, incumprindo as súas promesas e a lexislación urbanística.

Agardamos pois desde Elviña que as xestións do Partido Popular poidan valer para acadar unha solución de realoxo que o Concello da Coruña ten nas súas mans.

Manifestación do 14 de maio de 1984


El Ideal Gallego.

14/05/09
Hai 25 anos >1984



Numerosos veciños de Castro de Elviña protagonizaron onte sábado un corte de tráfico na avenida de Alfonso Molina, por espazo duns vinte minutos, á altura do cruce de acceso ao barrio coa citada avenida.


A protesta veciñal está motivada pola supresión do antigo paso a causa do novo acceso á autopista. Os veciños consideran que o peche do acceso ao barrio “está totalmente inxustificado e obriga os vehículos procedentes da zona a dar unha volta de preto de dous quilómetros”.

Etnografía de Elviña

No marco de actividades programadas pola UDC para celebrar o Día das Letras Galegas, vaise presentar o traballo feito pola arqueóloga Ana Filgueira sobre a etnografía de Elviña.

Presentarase este luns 18 de maio á unha da tarde na casa do Lagar. Coa publicación deste traballo preténdese, en palabras do secretario xeral da UDC, Xosé Carril, devolverlle ao pobo o que lle é propio.

O traballo contén un estudo amplo sobre Elviña, sobre a vida agraria e as pegadas que deixou, así como os topónimos que enchen o noso val. Trátase dun estudo inmenso que toda persoa coñecedora de Elviña debería ler.

A ben seguro é un libro do que fai falta unha boa lectura, non só polo cariño e profesionalidade que demostra a súa autora, senón tamén pola necesidade de que os sectores de poder que se empeñan en ignorar e destruír Elviña aprendan algo.

Benvidas sexan todas as iniciativas que servan para coñecer Elviña.

13/5/09

Manifestación do 17 de maio

A Mesa pola normalización lingüística volve convocar este ano unha manifestación polos dereitos da lingua galega. Baixo o lema "O galego, a nosa columna vertebral" están chamados a acodir todas as persoas que amen o galego, sexa o seu idioma habitual ou non.

Integrantes da Mesa convocando a

manifestación (A Nosa Terra)


A manifestación partirá ás doce da mañá na Alameda compostelá para dirixirse cara á praza da Quintana, agardando os convocantes unha participación masiva dos galegos.

A especial relevancia deste convocatoria vén marcada polos fortes ataques que está a padecer o idioma galego. Tras unha prominente campaña na que se lle quixo facer ver á sociedade galega que a Xunta estaba aplicando políticas de imposición lingüística do galego, grupos contrarios ao galego esixen que se cambie a normativa lingüística en favor do castelán.


Tedes máis información da convocatoria e sobre os buses que saen de diferentes puntos do país en:

http://www.amesanl.org/campanhas.html#17maio2009

9/5/09

Tráfico en Elviña

Cardador garante que se mellorará o tráfico en Castro de Elviña
La Opinión de A Coruña
A Coruña/metro 09/05/09

Redacción /A Coruña. O responsábel municipal das áreas de Tráfico e Seguridade Cidadá, Florencio Cardador, entrevistouse cos representantes dos veciños de Castro de Elviña, con quen se comprometeu a buscar solucións que melloren o tráfico na zona.


O primeiro compromiso de Cardador cos residentes foi falar con outras concellerías para deseñar un itinerario máis seguro que comunique o barrio co centro de saúde de Matogrande.

O responsábel de Tráfico destacou que tamén haberá que considerar o futuro plano de mobilidade, onde deberá incluírse a posibilidade de cambiar o sentido de circulación nalgunhas vías de Castro de Elviña para conseguir que sexan de sentido único e aumentar así a seguridade dos peóns.

Sobre a estrada que une o barrio coa Zapateira, Cardador afirmou que o acondicionamento da vía depende da Deputación, a quen instará para a construcción de beirarrúas e para que pinte e sinalice os pasos de peóns.

Os veciños tamén pediron ao concelleiro socialista que medie ante a Universidade da Coruña para que limpe e pinte as estradas do Campus que conectan con Castro de Elviña, así como ante a Xunta para acondicionar outras vías que son da súa titularidade.


______

Tamén na Voz de Galicia:

8/5/09

Elviña en archetenrreiro

O blogue cultural de Marcial Tenreiro publica un artigo titulado Pola defensa de Elviña. Desde a súa mirada reflexiva lévanos a unha discusión entre a dicotomía establecida entre “progreso” e “patrimonio”, e a como se usan estes conceptos contra os que viven en áreas con forte pegada cultural.


Dentro do artigo, que vos convidamos a ler, destacamos un comentario marcado por unha fina ironía que ben resume moito do que levamos falado sobre a destrución do rural:


“É dicir cando pensamos no patrimonio pensamos en pedra e nunca no entorno desas pedras, e o entorno de Elviña é o dunha aldea rural, a única que lles queda posiblemente aínda, como "aldea irreductible" de Asterix na La-Coruña postvazquista, esa do ladrillo e dos parques temáticos -perdon museos-. Esa aldea "rural", con perdon, ten un contexto, unhas formas de vida, uns usos, chamenselle tradicións (…)”




Moi interesante é a perspectiva diacrónica que nos ofrece no seu artigo, sobre a nosa vision dos que viviron no pasado para achegarse a un presente no que temos que achantar ante o que o progreso nos dita.


En fin, moi refrescante a súa mirada desde a lóxica do legado cultural. Ficamos moi agradecidos desde Elviña e convidámolo a participar no rescate da nosa memoria.

O artigo podedes lelo en:http://www.blogoteca.com/archetenrreiro/

7/5/09

Proxectos novos para o Campus de Elviña

La Opinión de A Coruña
A Coruña /Metro
06/05/09
A Universidade edificará un centro tecnolóxico da terceira idade
A institución académica saca a concurso a redacción do proxecto
deste inmóbel e do plano director dos campus da Coruña e Ferrol.
Redacción/A Coruña. A Universidade convocou esta semana os concursos públicos para encargar a redacción dos proxectos de execución do seu centro tecnolóxico da terceira idade e dun edificio na área científica no seu parque tecnolóxico, a construción da unidade de investigación sobre a aplicación da madeira e o deseño dos planos directores de infraestruturas dos campus da Coruña e Ferrol. Todos os proxectos foron licitados a través do Diario Oficial de Galiza.

Unha vez contratado, o proxecto básico e de execución do centro da terceira idade deberá estar redactado nun prazo máximo de 105 días cun orzamento máximo de 152.000 euros.
No caso do edificio para a área científica do parque tecnolóxico da Universidade, o prazo de execución é de 120 días e o importe 184.440 euros. Para a construcción da unidade mixta de investigación sobre a aplicación da madeira no campus da Zapateira, a Universidade reservou un máximo de 275.040 euros, cun prazo de execución non superior a catro meses e medio.

A Universidade, ademais, licitou a redacción do seu plano director de infraestruturas en dous lotes: un, para os campus da Coruña –Elviña, A Maestranza, Riazor, Oza e Oleiros-, por 151.960 euros e 120 días de execución; e outro para os de Ferrol –Serantes e Esteiro-, por un importe de 48.720 euros e un máximo de noventa días.

3/5/09

Os veciños de Elviña, perennes expropiados do Concello coruñés

Existe temor a que se inicien as obras da residencia do campus da UDC antes de realoxar aos afectados de doce casas que se derribarán ·· O pacto verbal con Vivenda o 18 de febreiro aínda non foi asinado

(El Correo Gallego) "O Plan parcial para o Campus Universitario (aprobado o 18 de outubro de 1991) obriga ao realoxo de expropiados no seu entorno", recorda Carlos Maceiras, presidente da Asociación de Veciños Os Rexumeiros de Elviña e Castro, quen teme que se inicie a construcción da área residencial da Universidade da Coruña (UDC) sen terse dado unha solución aos vinte habitantes das doce vivendas afectadas polo proxecto.

É máis, recorda que "tras un ano de negociacións chegamos a un pacto coa Consellería de Vivenda o pasado 18 de febreiro, pero polo cambio de goberno non se chegou firmar", polo que espera que "as novas autoridades fosen informadas deste acordo no traspaso de poderes realizado días atrás".

Maceiras, sobre as conversas mantidas primeiro co Concello da Coruña e as consellerías de Innovación e Industria, que amplía as instalacións do Parque Tecnolóxico da UDC, e de Vivenda, da que depende a nova área residencial do campus de Elviña, sinala que "esta última foi a que asumiu finalmente as competencias das outras administracións para chegar a un pacto".

"As negociaciones foron duras, xa que no entendiamos como Industria pagaba ultimamente a expropiación das casas a 812 euros o metro cadrado, que ao final foi o acordado, para o seu Parque Tecnóloxico, cando ao lado, Vivenda para a súa Área Residencial só ofrecía 520 euros", precisa o presidente veciñal, quen afirma que, por outro lado, en canto ao solo urbán consolidado (fincas nas que se pode edificar) contrasta que "se expropiara a 105 euros o metro cadrado", cando pola parte inferior ao campus, no novo polígono de Mesoiro os promotores comprárono a 600 euros. "Esa é a diferencia real co mercado", apunta.

"Gustaríanos seguir con este mesmo tipo de vida, sen ningún asedio constructivo", comenta pola súa parte Luís Gómez, vicepresidente da A.VV., quen argumenta que "sabemos que a residencia universitaria e o parque tecnolóxico son necesarios pero pedimos que se fagan dunha forma racional, e por iso queremos que se anule o PERI (Plan especial de reforma de 1991) da zona e esta pase a ser un ARI (Área de rehabilitación integral) dun núcleo rural".

"O 25 de marzo pedímoslle unha entrevista á edil de Urbanismo no Concello, e o 21 de abril ao Alcalde, e aínda non temos novas", indica Maceiras, quen di que nunha reunión mantida o martes, co reitor da UDC, José María Barja, este aseguroulles que non desexa ter ningún conflicto social.

2/5/09

A cartografía crítica da Coruña

Rede Social de Direitos Sociais


A RDS é unha plataforma que suma o traballo de varios colectivos do concello da Coruña para identificar desde unha postura crítica diversos aspectos no noso entorno. En base ao traballo sobre tres eixos fundamentais, xénero, migración e territorio, veñen de elaborar a primeira cartografía crítica da Coruña.

Esta cartografía nace coa idea de ser o primeiro chanzo para un traballo continuo que axude a identificar problemas e servir de ferramenta para a súa solución. Un aspecto ben interesante está na idea de que os cidadáns superen o seu rol de espectadores no escenario no que habitan e actúen “na procura dun entorno territorial consciente e autoxestionado”.

Nesta primeira edición, incídese en lugares con especulación social e sobre o territorio, na precariedade laboral e traballo migrante, nas fronteiras interiores que actúan como muro invisíbel contra a comunidade migrante, e nos espacios de lecer programado fronte aos espazos de consumo. Tamén se lle dedica atención a barrios.

Lonxe de ser un documento de denuncia supón un elemento de identificación de conflictos, como primeiro paso cara a proposta de alternativas. Esas alternativas pasan por un esforzo conxunto de toda a sociedade.

No que respecta a Elviña, poderíamos dicir que as nosas asociacións, tanto Tempo Novo como os Rexumeiros, están implicados neste proxecto. Os principios nos que se fundamenta a RDS encaixan perfectamente coa liña da actuación veciñal; a traxectoria actual ten os seus piares no cese de abusos que traen as expropiacións, e ao tempo trata de acadar o cumio de manter o noso territorio tal e como o coñecemos, no que queremos vivir, tratando de manter ese legado ás xeracións futuras.

As asociacións que participan na RDS, ademais das citadas son:

Asociación de Veciños de Monte Alto (http://barriomontealto.blogaliza.org/)

Centro Social Atreu (http://atreu.info/)

Arquitectos sen fronteiras (http://asfes.org/)

Colectivo parafeminista Nomepisesofreghao (http://nomepisesofreghao@blogaliza.org/)

A hora dos mouros

O blogue cultural A hora dos mouros faise eco da criazón do noso blogue e inclúe un enlace baixo o título A loita en Elviña.
Este blogue é un espazo para a difusión da cultura galega e mantén un espírito crítico coas políticas sobre o noso patrimonio cultural. Exemplos desa loita pola conservación son as plataformas Mariña Patrimonio e a Plataforma na Defensa do Patrimonio das Pontes.

Non é de estrañar unha afinidade e unha sensibilidade pontesa cara ás terras de Elviña. Eles tamén saben moito de expropiacións, pois a mina de lignitos supuxo a desaparición de aldeas enteiras e un gran espolio de terras.

Agardamos poder corresponder a esa gratitude cara a nós.

http://ahoradosmouros.blogspot.com/